ಬೆಂಗಳೂರು: ಕರ್ನಾಟಕದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿದೆ. ರಾಜ್ಯದಲ್ಲಿ ಅತಿ ಹೆಚ್ಚು ಎಲೆಕ್ಟ್ರಿಕ್ ವಾಹನಗಳು ಇರುವ ನಗರ ಬೆಂಗಳೂರು. ನಗರದಲ್ಲಿ ಎಲೆಕ್ಟ್ರಿಕ್ ವಾಹನಗಳನ್ನು ಖರೀದಿ ಮಾಡಲು ಉತ್ತೇಜನ ನೀಡಲು ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿ ನಿಯಮಿತ (ಬೆಸ್ಕಾಂ) ಪ್ರತ್ಯೇಕ ಘಟಕವನ್ನು ರಚನೆ ಮಾಡಿದೆ. ಕೇಂದ್ರ ಸರ್ಕಾರದ ಮಾರ್ಗಸೂಚಿಗಳ ಪ್ರಕಾರ ಈ ಘಟಕ ರಚಿಸಿದ್ದು, ಕಳೆದ ತಿಂಗಳು ಇದು ಕಾರ್ಯಾರಂಭ ಮಾಡಿದೆ.
ಬೆಸ್ಕಾಂ ಅಧಿಕಾರಿಗಳ ಮಾಹಿತಿ ಪ್ರಕಾರ ಸುಮಾರು 83 ಲಕ್ಷ ರೂ. ವೆಚ್ಚದಲ್ಲಿ EV Accelerator Cell ಅನ್ನು ಬೆಸ್ಕಾಂ ತೆರೆದಿದೆ. ಈ ಕೋಶದಲ್ಲಿ ಕಾರ್ಯ ನಿರ್ವಹಣೆ ಮಾಡಲು ಕ್ಷೇತ್ರದ ನುರಿತ ವೃತಿಪರರನ್ನು ನೇಮಕ ಮಾಡಿದೆ. ಎಲೆಕ್ಟ್ರಿಕ್ ವಾಹನಗಳ ಖರೀದಿಗೆ ಜನರನ್ನು ಉತ್ತೇಜಿಸುವುದು ಈ ಘಟಕದ ಕಾರ್ಯವಾಗಿದೆ.
ಕೇಂದ್ರ ಸರ್ಕಾರದ ಸೂಚನೆ: ಕೇಂದ್ರದ ಇಂಧನ ಸಚಿವಾಲಯದ ಅಡಿಯಲ್ಲಿರುವ ಇಂಧನ ದಕ್ಷತೆಯ ಬ್ಯೂರೊ (ಬಿಇಇ), 2023ರಲ್ಲಿ ಎಲೆಕ್ಟ್ರಿಕ್ ವಾಹನಗಳ ಖರೀದಿ, ಬಳಕೆ ಕುರಿತು ಅರಿವು ಮೂಡಿಸಲು ಈ ಮಾದರಿ ಘಟಕ ರಚನೆ ಮಾಡಬೇಕು ಎಂದು ಎಲ್ಲಾ ರಾಜ್ಯಗಳ ವಿದ್ಯುತ್ ಸರಬರಾಜು ಕಂಪನಿಗಳಿಗೆ ಸೂಚನೆ ನೀಡಿತ್ತು.
ಈಗಾಗಲೇ ಮಹಾರಾಷ್ಟ್ರ, ಕೇರಳ, ತಮಿಳುನಾಡು, ಗುಜರಾತ್, ಉತ್ತರ ಪ್ರದೇಶ ರಾಜ್ಯಗಳಲ್ಲಿ ಈ ಮಾದರಿ ಘಟಕ ಆರಂಭಿಸಲಾಗಿದೆ. ಈಗ ಬೆಸ್ಕಾಂ ಸಹ ಘಟಕ ಆರಂಭಿಸಿದ್ದು, ನವೆಂಬರ್ ತಿಂಗಳಿನಿಂದ ಅದು ಎಲೆಕ್ಟ್ರಿಕ್ ವಾಹನಗಳ ಖರೀದಿ ಉತ್ತೇಜಿಸಲು ಕಾರ್ಯತಂತ್ರವನ್ನು ರೂಪಿಸುತ್ತಿದೆ.
ಈ ಘಟಕ ಕರ್ನಾಟಕದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಖರೀದಿ, ಬಳಕೆ ಸೇರಿದಂತೆ ಎಲ್ಲಾ ಮಾಹಿತಿಯನ್ನು ನೀಡಲು ಏಕ ಗವಾಕ್ಷಿ ವ್ಯವಸ್ಥೆಯಾಗಿ ಕಾರ್ಯ ನಿರ್ವಹಣೆ ಮಾಡಲಿದೆ. ಚಾರ್ಜಿಂಗ್ ಸ್ಟೇಷನ್ ನಿರ್ಮಾಣ, ಚಾರ್ಜಿಂಗ್ ಶುಲ್ಕದ ಕುರಿತ ಮಾಹಿತಿ ಸೇರಿದಂತೆ ಎಲ್ಲಾ ವಿವರಣೆಗಳನ್ನು ಈ ಘಟಕದ ಮೂಲಕ ಪಡೆಯಬಹುದು. ಅಲ್ಲದೇ ಈ ಘಟಕ ಹಂತ ಹಂತವಾಗಿ ಆಂತರಿಕ ದಹನಕಾರಿ ಎಂಜಿನ್ (ಐಸಿಇ) ಮಾದರಿಯ ಎಲ್ಲಾ ಬೈಕ್, ಕಾರು, ಆಟೋ, ವ್ಯಾನ್, ಬಸ್ಗಳ ಬಳಕೆಯನ್ನು ಹಂತ ಹಂತವಾಗಿ ನಗರದಲ್ಲಿ ಕಡಿಮೆ ಮಾಡಲು ಸಹ ಸಲಹೆಗಳನ್ನು ನೀಡಲಿದೆ.
ಈ ಘಟಕ ಎಲೆಕ್ಟ್ರಿಕ್ ವಾಹನಗಳ ಬ್ಯಾಟರಿ ಚಾರ್ಜಿಂಗ್ ಸ್ಟೇಷನ್, ಬ್ಯಾಟರಿ ಸ್ವೈಪಿಂಗ್ ಸ್ಟೇಷನ್, ಎಲೆಕ್ಟ್ರಿಕ್ ವಾಹನಗಳ ನೋಂದಣಿ ಕುರಿತು ಪ್ರತಿ ತಿಂಗಳು ಮಾಹಿತಿ ಸಂಗ್ರಹಣೆ ಮಾಡಿ ದತ್ತಾಂಶ ಕೇಂದ್ರದಂತೆ ಕಾರ್ಯ ನಿರ್ವಹಣೆ ಮಾಡಲಿದೆ. ಚಾರ್ಜಿಂಗ್ ಸ್ಟೇಷನ್, ಬ್ಯಾಟಪಿ ಸ್ವೈಪಿಂಗ್ ಸ್ಟೇಷನ್ ನಿರ್ಮಾಣ ಮಾಡಲು ಸ್ಥಳವನ್ನು ಸೂಚಿಸಲು ವಿವಿಧ ಸ್ಥಳೀಯ ಸಂಸ್ಥೆಗಳ ಜೊತೆಗೂಡಿ ಕೆಲಸವನ್ನು ಸಹ ಮಾಡಲಿದೆ.
ಈ ಘಟಕ ‘ಗೋ ಎಲೆಕ್ಟ್ರಿಕ್ ಅಭಿಯಾನ’ ವನ್ನು ಆರಂಭಿಸಲಿದೆ. ಈ ಕಾರ್ಯಕ್ರಮದಡಿ ಸಾರ್ವಜನಿಕರಲ್ಲಿ ಎಲೆಕ್ಟ್ರಿಕ್ ವಾಹನಗಳ ಬಳಕೆಯ ಕುರಿತು ಅರಿವು ಮೂಡಿಸಲಾಗುತ್ತದೆ. ಇದಕ್ಕಾಗಿ ಕಾರ್ಯಾಗಾರ, ರೋಡ್ ಶೋ ಸೇರಿದಂತೆ ವಿವಿಧ ಪ್ರವಾರ ಕಾರ್ಯಕ್ರಮವನ್ನು ನಡೆಸಲಿದೆ. ಇವಿ ಘಟಕ ಸ್ಥಾಪನೆಗೆ ಸಹ ಉತ್ತೇಜನ ನೀಡಲು ಉದ್ಯಮಿಗಳಿಗೆ ಇದು ಸಲಹೆಯನ್ನು ನೀಡಲಿದೆ.
ಕರ್ನಾಟಕದ ರಾಜ್ಯಮಟ್ಟದ ಈ ಮಾದರಿ ಘಟಕವನ್ನು ಶೀಘ್ರದಲ್ಲೇ ಆರಂಭ ಮಾಡಲಾಗುತ್ತದೆ. ಇದರಲ್ಲಿ ಇಂಧನ ಸಚಿವರು, ಇಲಾಖೆಯ ಹಿರಿಯ ಅಧಿಕಾರಿಗಳು, ಸಾರಿಗೆ ಇಲಾಖೆಯ ತಜ್ಞರು, ಉದ್ಯಮಿಗಳು ಸದಸ್ಯರಾಗಿ ಇರಲಿದ್ದಾರೆ. ಇಂಧನ ದಕ್ಷತೆಯ ಬ್ಯೂರೊ (ಬಿಇಇ) ಮಾಹಿತಿ ಪ್ರಕಾರ ಕರ್ನಾಟಕದಲ್ಲಿ 5,765 ಎಲೆಕ್ಟ್ರಿಕ್ ವಾಹನ ಚಾರ್ಜಿಂಗ್ ಸ್ಟೇಷನ್ಗಳಿವೆ. ಮಹಾರಾಷ್ಟ್ರದಲ್ಲಿ 3,728, ಉತ್ತರ ಪ್ರದೇಶದಲ್ಲಿ 1.998, ದೆಹಲಿಯಲ್ಲಿ 11941 ಸ್ಟೇಷನ್ಗಳಿವೆ.
ಬೆಳಗಾವಿ ಕಾಂಗ್ರೆಸ್ ಅಧಿವೇಶನ: “ಗಾಂಧಿ ಭಾರತ” ಕಾರ್ಯಕ್ರಮದ ವೇಳಾಪಟ್ಟಿ ಇಲ್ಲಿದೆ
