Greater Bengaluru News9: ಹರಿಹರ ನಗರದ ಬೆಸ್ಕಾಂ ವಿಭಾಗೀಯ ಕಚೇರಿ ಉಗ್ರಾಣದಲ್ಲಿ ಸುಮಾರು ₹3.85 ಕೋಟಿಗೂ ಅಧಿಕ ಮೌಲ್ಯದ ಸಾಮಗ್ರಿಗಳು ನಾಪತ್ತೆಯಾಗಿರುವ ಬೃಹತ್ ಹಗರಣದ ಕುರಿತು ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
ಈ ಹಗರಣಕ್ಕೆ ಸಂಬಂಧಿಸಿದ ಅಧಿಕಾರಿಗಳನ್ನು ಕೂಡಲೇ ಸೇವೆಯಿಂದ ವಜಾಗೊಳಿಸಿ, ಬಂಧಿಸಿ ಮತ್ತು ಅವರ ಆಸ್ತಿ-ಪಾಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲು ವಿಶ್ವ ಕರ್ನಾಟಕ ರಕ್ಷಣಾ ವೇದಿಕೆ (ವಿಶ್ವ ಕರವೇ) ಆಗ್ರಹಿಸಿದೆ.
ವಿಶ್ವ ಕರವೇ ರಾಜ್ಯ ಘಟಕದ ಉಪಾಧ್ಯಕ್ಷ ನಾಗರಾಜ್ ಭಂಡಾರಿ ಅವರು ಇತ್ತೀಚೆಗೆ ನಗರದ ಪತ್ರಿಕಾ ಭವನದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಬೆಸ್ಕಾಂ ಇಇ ರವಿಕಿರಣ್ ಅವರು ನೀಡಿದ ದೂರಿನ ಪ್ರಕಾರ, ಒಟ್ಟು 39 ವಿಧದ ₹3,85,69,119 ಮೌಲ್ಯದ ಸಾಮಗ್ರಿಗಳು ಉಗ್ರಾಣದಿಂದ ಕಾಣೆಯಾಗಿವೆ. ಈ ಪ್ರಕರಣದಲ್ಲಿ ಸಹಾಯಕ ಉಗ್ರಾಣ ಪಾಲಕ (ಎ.ಎಸ್.ಕೆ.) ಜಿ.ಎನ್. ಅರುಣ್ ಕುಮಾರ್ ಹಾಗೂ ಇತರರು ಆರೋಪಿಗಳಾಗಿದ್ದಾರೆ ಎಂದು ತಿಳಿಸಿದರು.
ಇದು ₹8 ಕೋಟಿ ಹಗರಣವೇ?
ಮೇಲ್ನೋಟಕ್ಕೆ ₹3.85 ಕೋಟಿ ಮೊತ್ತ ಕಂಡರೂ, ವಾಸ್ತವವಾಗಿ ಇದು ಏಳೆಂಟು ಕೋಟಿ ರೂ.ಗಳ ಬೃಹತ್ ಹಗರಣ ಆಗಿರಬಹುದು ಎಂದು ನಾಗರಾಜ್ ಭಂಡಾರಿ ಅವರು ಅನುಮಾನ ವ್ಯಕ್ತಪಡಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ, ತಜ್ಞರು ಒಳಗೊಂಡ ಬೆಸ್ಕಾಂ ವಿಜಿಲೆನ್ಸ್ನಿಂದಲೂ ಈ ಹಗರಣದ ಕುರಿತು ಸಮಾನಾಂತರ ತನಿಖೆ ನಡೆಯಬೇಕು ಎಂದು ಒತ್ತಾಯಿಸಿದರು.
ಪ್ರಮುಖ ಬೇಡಿಕೆಗಳು:
- ಸಂಪೂರ್ಣ ಜಪ್ತಿ: ಉಗ್ರಾಣದಿಂದ ಟಿಸಿ (ಟ್ರಾನ್ಸ್ಫಾರ್ಮರ್) ಯಂತಹ ಸಾಮಗ್ರಿಗಳನ್ನು ಹೊರಗೆ ಸಾಗಿಸಲು ಮಂಜೂರಾತಿ ಮತ್ತು ಸಹಿ ನೀಡಿದ ಎಲ್ಲಾ ಅಧಿಕಾರಿಗಳನ್ನು ತಕ್ಷಣವೇ ಆರೋಪಿಗಳನ್ನಾಗಿಸಿ, ಅವರ ಆಸ್ತಿ, ಪಾಸ್ತಿಗಳನ್ನು ಜಪ್ತಿ ಮಾಡಬೇಕು.
- ಹೊರಗಿನವರ ಬಂಧನ: ಹಗರಣದ ಸಾಮಗ್ರಿಗಳನ್ನು ಕಡಿಮೆ ಬೆಲೆಗೆ ಖರೀದಿಸಿದ ಶಂಕಿತ ವ್ಯಕ್ತಿಗಳನ್ನು ಮತ್ತು ವಿದ್ಯುತ್ ಕೆಲಸ ಮಾಡುವ ಹೊರಗಿನವರನ್ನು ಪತ್ತೆ ಹಚ್ಚಿ ಬಂಧಿಸಬೇಕು.
ಹಿರಿಯ ಅಧಿಕಾರಿಗಳ ಮೌನದ ಹಿಂದೆ ದೊಡ್ಡ ಕಾರಣ?
ಕೋಟ್ಯಂತರ ರೂ. ಹಗರಣ ನಡೆದಿರುವ ಬಗ್ಗೆ ದೂರು ದಾಖಲಾಗಿದ್ದರೂ, ಬೆಸ್ಕಾಂನ ಹಿರಿಯ ಅಧಿಕಾರಿಗಳಾದ ಎಸ್ಇ, ಸಿಇ ಮತ್ತು ಎಂಡಿ ಅವರು ಒಮ್ಮೆಯೂ ಸ್ಥಳಕ್ಕೆ ಭೇಟಿ ನೀಡದಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ ಎಂದು ಸಂಘಟನೆ ಗಂಭೀರ ಆರೋಪ ಮಾಡಿದೆ.
“ಹಲವು ಕೋಟಿ ಹಗರಣ ನಡೆದರೂ ಹಿರಿಯ ಅಧಿಕಾರಿಗಳು ಸ್ಥಳಕ್ಕೆ ಬಾಲರು. ಅವರಿಗೆ ಇದರಲ್ಲಿ ಪಾಲು ಸಿಕ್ಕಿದೆಯೇ?” ಎಂಬುದರ ಬಗ್ಗೆ ತನಿಖೆಯಾಗಬೇಕು ಎಂದು ಅವರು ಆಗ್ರಹಿಸಿದ್ದಾರೆ.
ನಾಗರಾಜ್ ಭಂಡಾರಿ ಅವರು ಇದೇ ವೇಳೆ, “ಬಡವರು ಮನೆ ಕಟ್ಟುವಾಗ ಟಿಪಿ ಪಡೆದಿಲ್ಲ ಎಂದು ವಿಜಿಲೆನ್ಸ್ ಅಧಿಕಾರಿಗಳು ಸಹಸ್ರಾರು ರೂ. ದಂಡ ವಿಧಿಸುತ್ತಾರೆ, ಆದರೆ ಇಲಾಖಾಧಿಕಾರಿಗಳ ಕೋಟ್ಯಂತರ ರೂ. ಹಗರಣ ಏಕೆ ಕಾಣಿಸಲಿಲ್ಲ?” ಎಂದು ಪ್ರಶ್ನಿಸಿದ್ದಾರೆ.
ನಗರಸಭಾ ಸದಸ್ಯ ಎಂ.ಬಿ. ಅಣ್ಣಪ್ಪ ಮಾತನಾಡಿ, “ಬೆಸ್ಕಾಂ ಭ್ರಷ್ಟಾಚಾರಮುಕ್ತವಾದರೆ ವಿದ್ಯುತ್ ಯೂನಿಟ್ ದರವನ್ನು ಅರ್ಧಕ್ಕೆ ಇಳಿಸಿದರೂ ಕಂಪನಿ ಲಾಭದಲ್ಲಿರುತ್ತದೆ. ಹಗರಣದ ರೂವಾರಿಗಳನ್ನು ಪತ್ತೆ ಮಾಡಿ ಶಿಕ್ಷಿಸಲು ಇಂಧನ ಸಚಿವ ಕೆ.ಜೆ. ಜಾರ್ಜ್ ಅವರು ಕೂಡಲೇ ಕ್ರಮ ಕೈಗೊಳ್ಳಬೇಕು,” ಎಂದು ಒತ್ತಾಯಿಸಿದರು.
ಕಳೆದುಹೋದ ಸಾಮಗ್ರಿಗಳ ಬಗ್ಗೆ ಮತ್ತು ಹಿರಿಯ ಅಧಿಕಾರಿಗಳ ಪಾತ್ರದ ಬಗ್ಗೆ ಸಮಗ್ರ ತನಿಖೆ ನಡೆಸಿ, ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ವಿಶ್ವ ಕರವೇ ಪದಾಧಿಕಾರಿಗಳು ಸರ್ಕಾರಕ್ಕೆ ಆಗ್ರಹಿಸಿದ್ದಾರೆ.
