Greater Bengaluru News9: ಕಟ್ಟಡಗಳು ಸುಸ್ಥಿತಿಯಲ್ಲಿದ್ದು, ವಿವಿಧ ಕಾರಣಗಳಿಂದ ಸ್ಥಗಿತಗೊಂಡಿರುವ ವಿದ್ಯುತ್ ಸಂಪರ್ಕಗಳನ್ನು (Reactivation) ಪುನಃ ಪಡೆಯಲು ಇಚ್ಛಿಸುವ ಗ್ರಾಹಕರಿಗೆ ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿ (ಬೆಸ್ಕಾಂ) ಹೊಸ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ. ಪ್ರಕ್ರಿಯೆಯನ್ನು ಸರಳೀಕರಿಸುವ ಮತ್ತು ತ್ವರಿತ ಸೇವೆ ನೀಡುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗಿದೆ.
ಮರುಸ್ಥಾಪನೆಗೆ ಅರ್ಹತೆಗಳು ಮತ್ತು ಷರತ್ತುಗಳು:
ಕಟ್ಟಡದ ಸ್ಥಿತಿ: ವಿದ್ಯುತ್ ಸಂಪರ್ಕ ಕಡಿತಗೊಂಡಿರುವ ಕಟ್ಟಡವು ಧ್ವಂಸವಾಗಿರಬಾರದು ಅಥವಾ ಅದರ ಮೂಲ ರಚನೆಯಲ್ಲಿ ಯಾವುದೇ ಬದಲಾವಣೆ ಮಾಡಿರಬಾರದು.
ಬಾಕಿ ಪಾವತಿ: ಗ್ರಾಹಕರು ಬಾಕಿ ಇರುವ ಎಲ್ಲಾ ವಿದ್ಯುತ್ ಬಿಲ್, ಸ್ಥಿರ ಶುಲ್ಕ (Fixed charges) ಮತ್ತು ಬಡ್ಡಿಯನ್ನು ಪಾವತಿಸಲು ಸಮ್ಮತಿಸಬೇಕು.
ಭದ್ರತಾ ಠೇವಣಿ: ಅನ್ವಯವಾಗುವ ಭದ್ರತಾ ಠೇವಣಿಯನ್ನು (Security Deposit) ಪಾವತಿಸುವುದು ಕಡ್ಡಾಯ.
ಅರ್ಜಿ ಸಲ್ಲಿಸುವ ವಿಧಾನ:
ಗ್ರಾಹಕರು ನಿಗದಿತ ದಾಖಲೆಗಳೊಂದಿಗೆ ಉಪ-ವಿಭಾಗದ (Sub-division) ಕಚೇರಿಗೆ ಲಿಖಿತ ಮನವಿ ಸಲ್ಲಿಸಬೇಕು.
ಅರ್ಜಿದಾರರು ತಮ್ಮ ಹೆಸರಿನಲ್ಲೇ ಆಸ್ತಿ ಇರುವುದನ್ನು ದೃಢೀಕರಿಸಬೇಕು ಮತ್ತು ಬೆಸ್ಕಾಂನೊಂದಿಗೆ ಹೊಸ ವಿದ್ಯುತ್ ಸರಬರಾಜು ಒಪ್ಪಂದಕ್ಕೆ (Power Supply Agreement) ಸಹಿ ಹಾಕಬೇಕು.
ಯಾವುದೇ ವಿವಾದ ಉಂಟಾದಲ್ಲಿ ಬೆಸ್ಕಾಂ ಜವಾಬ್ದಾರನಲ್ಲ ಎಂಬ ‘ಇಂಡೆಮ್ನಿಟಿ ಬಾಂಡ್’ (Indemnity Bond) ನೀಡಬೇಕು.
ಅಧಿಕಾರಿಗಳ ಪರಿಶೀಲನಾ ಕ್ರಮ:
ಸ್ಥಳ ಪರಿಶೀಲನೆ: ಉಪ-ವಿಭಾಗದ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಕಟ್ಟಡದ ಸ್ಥಿತಿಯನ್ನು ಪರಿಶೀಲಿಸುತ್ತಾರೆ. ಈ ಸಂದರ್ಭದಲ್ಲಿ ಜಿಯೋ ಟ್ಯಾಗ್ ಮತ್ತು ಸಮಯ ನಮೂದಾಗಿರುವ (Geo Tagged & Time Stamped) ಭಾವಚಿತ್ರಗಳನ್ನು ತೆಗೆದುಕೊಳ್ಳುವುದು ಕಡ್ಡಾಯ.
ಅನುಮೋದನೆ: ಎಲ್.ಟಿ (LT) ಸಂಪರ್ಕಗಳಿಗೆ ವಿಭಾಗೀಯ ಕಚೇರಿ ಮಟ್ಟದಲ್ಲಿ ಮತ್ತು ಎಚ್.ಟಿ (HT) ಸಂಪರ್ಕಗಳಿಗೆ ವೃತ್ತ ಕಚೇರಿ ಮಟ್ಟದಲ್ಲಿ ಪರಿಶೀಲನೆ ನಡೆಸಿ ಅನುಮೋದನೆ ನೀಡಲಾಗುತ್ತದೆ.
ಡಿಜಿಟಲ್ ಸಕ್ರಿಯಗೊಳಿಸುವಿಕೆ: ಆರ್ಥಿಕ ವಿವರಗಳ ಪರಿಶೀಲನೆಯ ನಂತರ ಕಾರ್ಪೊರೇಟ್ ಕಚೇರಿಯಿಂದ ಸಿಸ್ಟಮ್ನಲ್ಲಿ ಮರುಸಕ್ರಿಯಗೊಳಿಸಲು ಕ್ರಮ ಕೈಗೊಳ್ಳಲಾಗುತ್ತದೆ.
ಈ ಹೊಸ ಪ್ರಕ್ರಿಯೆಯಿಂದಾಗಿ ಗ್ರಾಹಕರು ದೀರ್ಘಕಾಲದವರೆಗೆ ಸ್ಥಗಿತಗೊಂಡಿದ್ದ ವಿದ್ಯುತ್ ಸಂಪರ್ಕವನ್ನು ಕಾನೂನುಬದ್ಧವಾಗಿ ಮತ್ತು ಶೀಘ್ರವಾಗಿ ಪುನಃ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ.
