Greater Bengaluru News9 : ಟ್ರಾಫಿಕ್ ದಟ್ಟಣೆಯಿಂದ ಸಾಕಾಗಿರುವ ಬೆಂಗಳೂರು ಜನರಿಗೆ ಗುಡ್ನ್ಯೂಸ್. ನಮ್ಮ ಮೆಟ್ರೋ 3 ನೇ ಹಂತದಲ್ಲಿ ನಗರದ ಅತಿ ಉದ್ದದ ಡಬಲ್ ಡೆಕ್ಕರ್ ಫ್ಲೈಓವರ್ ನಿರ್ಮಾಣವಾಗುತ್ತಿದೆ. ಜೆಪಿ ನಗರ 4 ನೇ ಹಂತದ ಡೆಲ್ಮಿಯಾ ವೃತ್ತದಿಂದ ಹೆಬ್ಬಾಳದವರೆಗೆ 28.4 ಕಿ.ಮೀ ವಿಸ್ತರಿಸಲಿದೆ.
ಡಬಲ್ ಡೆಕ್ಕರ್ ಫ್ಲೈಓವರ್ ಅಂದರೆ, ಮೇಲ್ಭಾಗದಲ್ಲಿ ಮೆಟ್ರೋ ಮಾರ್ಗ, ಕೆಳಭಾಗದಲ್ಲಿ ವಾಹನ ಸಂಚಾರಕ್ಕೆ ಮೇಲ್ಸೇತುವೆ ಇರಲಿದೆ. ಇದರಿಂದ ಔಟರ್ ರಿಂಗ್ ರಸ್ತೆಯಲ್ಲಿ ಉಂಟಾಗುತ್ತಿದ್ದ ಸಂಚಾರ ದಟ್ಟಣೆಯು ಸಾಕಷ್ಟು ತಗ್ಗಲಿದೆ. ಮಾರ್ಗ ಮಧ್ಯೆ ಪ್ರಮುಖ ಪ್ರದೇಶಗಳಿಗೆ ಪ್ರವೇಶ, ನಿರ್ಗಮನಕ್ಕೆ ಲೂಪ್, ರ್ಯಾಂಪ್ಗಳನ್ನು ನೀಡಲಾಗುತ್ತಿದೆ. ಈ ಯೋಜನೆಯು ಬೆಂಗಳೂರಿನ ಸಂಚಾರ ದಟ್ಟಣೆಯನ್ನು ಕಡಿಮೆ ಮಾಡಿ, ನಗರದ ಅಭಿವೃದ್ಧಿಗೆ ಮತ್ತಷ್ಟು ಉತ್ತೇಜನ ನೀಡಲಿದೆ.
ನಮ್ಮ ಮೆಟ್ರೋ 3 ನೇ ಹಂತದ ಯೋಜನೆಯಲ್ಲಿ 2 ಮಾರ್ಗ ನಿರ್ಮಾಣ ಮಾಡಲಾಗುತ್ತಿದೆ. 1 ನೇ ಮಾರ್ಗ ಜೆಪಿ ನಗರ 4 ನೇ ಹಂತದಿಂದ ಹೆಬ್ಬಾಳದ ಕೆಂಪಾಪುರದವರೆಗೂ, 2 ನೇ ಮಾರ್ಗ ಹೊಸಹಳ್ಳಿ ಮೆಟ್ರೋ ನಿಲ್ದಾಣದಿಂದ ಕಡಬಗೆರೆವರೆಗೂ ಇರಲಿದೆ. ಈ 2 ಮಾರ್ಗದಲ್ಲಿಯೂ ಒಟ್ಟು 37 ಕಿ.ಮೀ ಡಬಲ್ ಡೆಕ್ಕರ್ ಫ್ಲೈ ಒವರ್ ನಿರ್ಮಾಣ ಮಾಡಲಾಗುತ್ತಿದೆ. ಈ 2 ಮಾರ್ಗಗಳಿಗೆ ಹೊಂದಿಕೊಂಡಂತೆ ಮಾಗಡಿ ರಸ್ತೆ ಮಾರ್ಗದಲ್ಲಿ ಕೆ.ಎಚ್.ಬಿ. ಕಾಲನಿ ಮತ್ತು ಕಡಬಗೆರೆ ನಡುವೆ 8.635 ಕಿ.ಮೀ, ಡೆಲ್ಮಿಯಾ ವೃತ್ತದಿಂದ ಹೆಬ್ಬಾಳದವರೆಗೆ 28.4 ಕಿ.ಮೀ ಡಬಲ್ ಡೆಕ್ಕರ್ ಫ್ಲೈಓವರ್ಗೆ ಯೋಜನೆ ರೂಪಿಸಲಾಗಿದೆ.
ಹಲವು ಪ್ರವೇಶ/ನಿರ್ಗಮನಕ್ಕೆ 5 ರ್ಯಾಂಪ್ಗಳು ಮತ್ತು 9 ಲೂಪ್ಗಳು ಇರಲಿವೆ. ಇವುಗಳನ್ನು ವಿಶೇಷವಾಗಿ ಔಟರ್ ರಿಂಗ್ ರೋಡ್ ಮತ್ತು ಮಾಗಡಿ ರಸ್ತೆಗಳ ಸ್ಥಳೀಯ ಸಂಚಾರ ಮಾದರಿಗಳಿಗೆ ಅನುಗುಣವಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಡೆಕ್ಕನ್ ಹೆರಾಲ್ಡ್ ವರದಿ ಮಾಡಿದೆ.
ಡೆಲ್ಮಿಯಾ ಸರ್ಕಲ್ – ಹೆಬ್ಬಾಳ ಫ್ಲೈ ಓವರ್ ಪ್ರವೇಶ – ನಿರ್ಗಮನಕ್ಕೆ ವ್ಯವಸ್ಥೆ ಎಲೆಲ್ಲಿ?
- ಸಾರಕ್ಕಿ ಜಂಕ್ಷನ್
- ನೈಸ್ ರಸ್ತೆ
- ವಿನಾಯಕ ಲೇಔಟ್
- ಸುಮನಹಳ್ಳಿ ಜಂಕ್ಷನ್
- ಗುರಗುಂಟೆ ಪಾಳ್ಯ
- ಹೆಬ್ಬಾಳ
ಈಗಿರುವ ಮೇಲ್ಸೇತುವೆಗಳ ಕತೆ ಏನು?
ಡೆಲ್ಮಿಯಾ ವೃತ್ತದಿಂದ ಹೆಬ್ಬಾಳದವರೆಗಿನ ಫ್ಲೈಓವರ್ನಲ್ಲಿ ಲೂಪ್ಗಳು ಸುಮಯ್ಯನಹಳ್ಳಿ ಜಂಕ್ಷನ್ ಮತ್ತು ನೈಸ್ ರಸ್ತೆಯಲ್ಲಿ ನಿರ್ಮಾಣವಾಗಲಿವೆ. ಡೆಲ್ಮಿಯಾ ವೃತ್ತವನ್ನು ಹೊರತುಪಡಿಸಿ, ಹೊಸ ಡಬಲ್ ಡೆಕ್ಕರ್ ಫ್ಲೈಓವರ್ ಹೊಸಕೆರೆಹಳ್ಳಿ, ಮೈಸೂರು ರಸ್ತೆ, ನಾಗರಭಾವಿ ಮತ್ತು ಸುಮನಹಳ್ಳಿ ಪ್ರಸ್ತುತವಿರುವ ಫ್ಲೈಓವರ್ಗಳ ಪಕ್ಕದಲ್ಲಿ ಅಥವಾ ಮೇಲಾಗಿ ನಿರ್ಮಾಣವಾಗಲಿದೆ ಎಂದು ಮೆಟ್ರೋ ಅಧಿಕಾರಿಗಳು ತಿಳಿಸಿದ್ದಾರೆ.
ಕೆ.ಎಚ್.ಬಿ. ಕಾಲನಿ ಮತ್ತು ಕಡಬಗೆರೆ ನಡುವಿನ ಫ್ಲೈ ಓವರ್ನಲ್ಲಿ ಕೆ.ಎಚ್.ಬಿ. ಕಾಲನಿ (ಹೊಸಹಳ್ಳಿ), ಸುಂಕದಕಟ್ಟೆ ಮತ್ತು ಕಡಬಗೆರೆಗಳಲ್ಲಿ ರ್ಯಾಂಪ್ಗಳನ್ನು ಅಳವಡಿಸಲಾಗುವುದು. ಸುಂಕದಕಟ್ಟೆಯಲ್ಲಿ, ಡಿಪೋಗೆ ಎರಡು ಕಡೆಗಳಲ್ಲಿ ರ್ಯಾಂಪ್ಗಳನ್ನು ಅಳವಡಿಸಲು ಯೋಜನೆ ಹಾಕಿಕೊಳ್ಳಲಾಗಿದೆ.
ಯೋಜನೆಯ ವೆಚ್ಚ ಎಷ್ಟು?
- ಯೋಜನೆಯ ಒಟ್ಟು ವೆಚ್ಚ 9,692.33 ಕೋಟಿ ರೂ.
- ಸಂಪೂರ್ಣವಾಗಿ ರಾಜ್ಯ ಸರ್ಕಾರದ ಅನುದಾನ
- ಕರ್ನಾಟಕ ಸರ್ಕಾರದ 50%, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ 10% ಮತ್ತು ಸಾಲಗಳ ಮೂಲಕ 40% ಹಣಕಾಸು ಒದಗಿಸಲಾಗುತ್ತಿದೆ.
ಡಬಲ್ ಡೆಕ್ಕರ್ ಫ್ಲೈ ಓವರ್ ಉಚಿತವಲ್ಲ?
ಫ್ಲೈಓವರ್ಗಳಲ್ಲಿ ಸಂಚರಿಸುವ ವಾಹನಗಳಿಗೆ ಸರ್ಕಾರ ಟೋಲ್ ವಿಧಿಸುವ ಯೋಜನೆ ಹೊಂದಿದೆ. ನಿಖರವಾದ ದರವನ್ನು ಇನ್ನೂ ನಿರ್ಧರಿಸಬೇಕಿದೆ.
ಯಾವಾಗ ಆರಂಭ ಆಗಬಹುದು?
ಕೇಂದ್ರ ಸರ್ಕಾರವು 2024 ಆಗಸ್ಟ್ 16 ರಂದು ಫೇಸ್ 3 ಗೆ ಅನುಮೋದನೆ ನೀಡಿದೆ. ಡಬಲ್ ಡೆಕ್ಕರ್ ರಚನೆಗಾಗಿ ವಿನ್ಯಾಸವನ್ನು ಮರುರೂಪಿಸುವ ಕಾರಣ ಸಿವಿಲ್ ಕಾಮಗಾರಿಗಳಲ್ಲಿ ವಿಳಂಬವಾಗಿದೆ. ಈ ಮೆಟ್ರೋ ಹಂತಕ್ಕೆ ಮೇ 2031 ರ ಗಡುವು ನಿಗದಿಪಡಿಸಲಾಗಿದೆ. ಆದರೆ, ಡಬಲ್ ಡೆಕ್ಕರ್ ಫ್ಲೈಓವರ್ 2030 ರ ವೇಳೆಗೆ ಪೂರ್ಣಗೊಳಿಸುವ ನಿರೀಕ್ಷೆಯಿದೆ.
