Greater Bengaluru News9: ಸಾರ್ವಜನಿಕರು ಸಣ್ಣಪುಟ್ಟ ಕೆಲಸಗಳಿಗೂ ಸರ್ಕಾರಿ ಕಚೇರಿಗಳಿಗೆ ಅಲೆದಾಡುವುದನ್ನು ತಪ್ಪಿಸಿ, ಜನರ ಮನೆಬಾಗಿಲಿಗೇ ಆಡಳಿತ ತಲುಪಿಸುವ ಮಹತ್ವಾಕಾಂಕ್ಷೆಯ ‘ಪ್ರಜಾಸೇವಾ ಅಭಿಯಾನ ಸರ್ಕಾರ ನಿಮ್ಮ ಮನೆಬಾಗಿಲಿಗೆ’ ಯೋಜನೆ ಹಾಗೂ ನೂತನ ‘ಪ್ರಜಾಸೇವೆ ಇಲಾಖೆ’ಗೆ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅಧಿಕೃತವಾಗಿ ಚಾಲನೆ ನೀಡಿದ್ದಾರೆ. ಹಾಗಾದ್ರೆ ದೂರು ನೀಡುವುದು ಹೇಗೆ? ಪರಿಹಾರ ಹೇಗೆ? ಪರಿಹಾರ ಆಗದಿದ್ರೆ ಮುಂದೇನು ಎನ್ನುವ ಬಗ್ಗೆ ಮುಂದೆ ಸಂಪೂರ್ಣ ಮಾಹಿತಿ ಓದಿ.
ವಿಜಯನಗರ ಜಿಲ್ಲೆಯ ಕೂಡ್ಲಿಗಿ ಹೋಬಳಿಯಲ್ಲಿ ಆಯೋಜಿಸಲಾಗಿದ್ದ ಸಮಾರಂಭದಲ್ಲಿ ಮಹಿಳಾ ಶಾಸಕಿ, ಸಂಸದೆ ಹಾಗೂ ಸರ್ಕಾರದ ಮುಖ್ಯ ಕಾರ್ಯದರ್ಶಿ ಶಾಲಿನಿ ರಜನೀಶ್ ಅವರೊಂದಿಗೆ ಸಿಎಂ ಜ್ಯೋತಿ ಬೆಳಗಿಸಿದರು. ಶಿಕ್ಷಕರ ದಿನಾಚರಣೆಯ ಸಂದರ್ಭದಲ್ಲೇ ಕಾರ್ಯಕ್ರಮ ನಡೆದಿದ್ದರಿಂದ, ಮಾಜಿ ರಾಷ್ಟ್ರಪತಿ ಡಾ. ಸರ್ವಪಲ್ಲಿ ರಾಧಾಕೃಷ್ಣನ್ ಅವರ ಭಾವಚಿತ್ರಕ್ಕೆ ಸಿಎಂ ಪುಷ್ಪ ನಮನ ಸಲ್ಲಿಸಿದರು. ಈ ಸಂದರ್ಭದಲ್ಲಿ ವಿವಿಧ ಜಿಲ್ಲೆಗಳ ನಾಗರಿಕರೊಂದಿಗೆ ಆನ್‌ಲೈನ್ ಸಂವಾದ ನಡೆಸಿ, ವ್ಯವಸ್ಥೆಯನ್ನು ಮತ್ತಷ್ಟು ಜನಸ್ನೇಹಿಯಾಗಿಸುವ ಕುರಿತು ಸಮಾಲೋಚಿಸಲಾಯಿತು.
ಪ್ರಜಾಸೇವೆ ಇಲಾಖೆಯ ಉದ್ದೇಶ ಹಾಗೂ ಕಾರ್ಯವೈಖರಿ
ಸರ್ಕಾರಿ ಸೇವೆಗಳ ವಿಳಂಬ, ಅರ್ಹರಿದ್ದರೂ ಯೋಜನೆಗಳ ಸೌಲಭ್ಯ ಸಿಗದಿರುವುದು, ಕಡತಗಳ ವಿಲೇವಾರಿ ಸಮಸ್ಯೆ ಸೇರಿದಂತೆ ವಿವಿಧ ಇಲಾಖೆಗಳ ನಡುವೆ ಸಿಲುಕಿರುವ ಜನಸಾಮಾನ್ಯರ ಅಹವಾಲುಗಳನ್ನು ನಿಗದಿತ ಕಾಲಮಿತಿಯಲ್ಲಿ ಬಗೆಹರಿಸುವುದೇ ಈ ಇಲಾಖೆಯ ಮುಖ್ಯ ಗುರಿಯಾಗಿದೆ. ಸಾರ್ವಜನಿಕರು ತಮ್ಮ ಸಮಸ್ಯೆ ಯಾವ ಇಲಾಖೆಗೆ ಸೇರಿದೆ ಎಂದು ತಿಳಿಯದಿದ್ದರೂ ಯಾವುದೇ ಹಿಂಜರಿಕೆಯಿಲ್ಲದೆ ದೂರು ದಾಖಲಿಸಬಹುದು; ವ್ಯವಸ್ಥೆಯೇ ಸಂಬಂಧಪಟ್ಟ ಇಲಾಖೆಗೆ ಅದನ್ನು ರವಾನಿಸಿ ವಿಲೇವಾರಿ ಮೇಲ್ವಿಚಾರಣೆ ನಡೆಸಲಿದೆ.
ದೂರು ಸಲ್ಲಿಸುವ ವಿಧಾನಗಳು ಸಾರ್ವಜನಿಕರು ಮೂರು ಪ್ರಮುಖ ಮಾರ್ಗಗಳ ಮೂಲಕ ದೂರು ನೋಂದಾಯಿಸಬಹುದು:
1902 ಉಚಿತ ಸಹಾಯವಾಣಿ: ಮೊಬೈಲ್ ಮೂಲಕ ನೇರವಾಗಿ ಕರೆ ಮಾಡಿ ಹೆಸರು, ವಿಳಾಸ, ತಾಲೂಕು, ಇಲಾಖೆ ಹಾಗೂ ಸಮಸ್ಯೆಯ ಪೂರ್ಣ ವಿವರ ನೀಡಿ ದೂರು ದಾಖಲಿಸಬಹುದು. ನೋಂದಣಿಯಾದ ತಕ್ಷಣ ಸಿಗುವ ‘ದೂರು ಸಂಖ್ಯೆ’ಯನ್ನು ಭವಿಷ್ಯದ ಪರಿಶೀಲನೆಗಾಗಿ ಕಾಯ್ದಿರಿಸಿಕೊಳ್ಳಬೇಕು.
ಡಿಜಿಟಲ್ ವೇದಿಕೆಗಳು: ಐಪಿಜಿಆರ್ಎಸ್ (IPGRS) ಪೋರ್ಟಲ್ ಅಥವಾ ‘ಜನಸ್ಪಂದನ’ ಮೊಬೈಲ್ ಆ್ಯಪ್ ಮೂಲಕ ನೈಜ ಸಮಯದಲ್ಲಿ ಅರ್ಜಿ ಸಲ್ಲಿಸಿ ಪ್ರಗತಿಯನ್ನು ಟ್ರ್ಯಾಕ್ ಮಾಡಬಹುದು.
ದೂರು ಪರಿಹಾರದ ಹಂತಗಳು ದಾಖಲಾದ ಪ್ರತಿಯೊಂದು ದೂರನ್ನು ಹಂತ ಹಂತವಾಗಿ ಪರಿಶೀಲಿಸಿ ವಿಲೇವಾರಿ ಮಾಡಲಾಗುತ್ತದೆ:
- ತಾಲೂಕು ಹಂತ: ತಹಶೀಲ್ದಾರ್ ಹಾಗೂ ತಾಲೂಕು ಪಂಚಾಯಿತಿ ಇಒಗಳು ಪರಿಶೀಲಿಸುತ್ತಾರೆ.
- ಉಪವಿಭಾಗ ಹಂತ: ತಾಲೂಕು ಮಟ್ಟದಲ್ಲಿ ಇತ್ಯರ್ಥವಾಗದ ಪ್ರಕರಣಗಳು ಸಹಾಯಕ ಆಯುಕ್ತರ (AC) ಪರಿಶೀಲನೆಗೆ ಒಳಪಡುತ್ತವೆ.
- ಜಿಲ್ಲಾಧಿಕಾರಿ ಹಂತ: ಅಲ್ಲಿಯೂ ಬಗೆಹರಿಯದ ಸಮಸ್ಯೆಗಳನ್ನು ಜಿಲ್ಲಾಧಿಕಾರಿಗಳು ಖುದ್ದು ಅಧಿಕಾರಿಗಳನ್ನು ಕರೆಸಿ ಇತ್ಯರ್ಥಪಡಿಸುತ್ತಾರೆ.
- ಇಲಾಖಾ ಮುಖ್ಯಸ್ಥರ ಹಂತ: ಈ ಯಾವುದೇ ಹಂತದಲ್ಲಿ ವಿಲೇವಾರಿಯಾಗದಿದ್ದಲ್ಲಿ, ದೂರು ಸ್ವಯಂಚಾಲಿತವಾಗಿ ರಾಜ್ಯ ಮಟ್ಟದ ಆಯಾ ಇಲಾಖಾ ಮುಖ್ಯಸ್ಥರಿಗೆ ವರ್ಗಾವಣೆಯಾಗುತ್ತದೆ.
ಪ್ರತಿ ಬುಧವಾರ ಪ್ರಗತಿ ಪರಿಶೀಲನೆ ಅಧಿಕಾರಿಗಳು ಕರ್ತವ್ಯಲೋಪ ಎಸಗದಂತೆ ತಡೆಯಲು ಪ್ರತಿ ಬುಧವಾರ ಮೂರು ಹಂತದ ಕಡ್ಡಾಯ ಪರಿಶೀಲನೆ ನಡೆಯಲಿದೆ:
- ಬೆಳಗ್ಗೆ 9:00 ರಿಂದ 11:00: ತಾಲೂಕು ಮಟ್ಟದ ಪರಿಶೀಲನೆ
- ಬೆಳಗ್ಗೆ 11:00 ರಿಂದ ಮಧ್ಯಾಹ್ನ 1:00: ಉಪವಿಭಾಗ ಮಟ್ಟದ ಪರಿಶೀಲನೆ
- ಮಧ್ಯಾಹ್ನ 3:00 ರಿಂದ ಸಂಜೆ 5:00: ಜಿಲ್ಲಾಧಿಕಾರಿಗಳ ನೇತೃತ್ವದಲ್ಲಿ ಅಂತಿಮ ಪರಿಶೀಲನೆ
ಪ್ರತಿ ಶನಿವಾರ ಸ್ಥಳದಲ್ಲೇ ‘ಪ್ರಜಾಸೇವಾ ಸಭೆ’
ಮುಂಬರುವ 3 ರಿಂದ 4 ತಿಂಗಳಲ್ಲಿ ರಾಜ್ಯದ ಎಲ್ಲ ಹೋಬಳಿ ಮತ್ತು ತಾಲೂಕುಗಳನ್ನು ತಲುಪಲು ವಿಶೇಷ ವೇಳಾಪಟ್ಟಿ ರೂಪಿಸಲಾಗಿದೆ:
- ಮೊದಲ ಮತ್ತು ಮೂರನೇ ಶನಿವಾರ: ತಾಲೂಕು ಕೇಂದ್ರಗಳಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವರ ನೇತೃತ್ವದಲ್ಲಿ ಸಭೆ.
- ಎರಡನೇ ಮತ್ತು ನಾಲ್ಕನೇ ಶನಿವಾರ: ತಾಲೂಕು ಅಥವಾ ಹೋಬಳಿ ಮಟ್ಟದಲ್ಲಿ ಸ್ಥಳೀಯ ಶಾಸಕರ ಅಧ್ಯಕ್ಷತೆಯಲ್ಲಿ ಜನಸ್ಪಂದನ.
21 ದಿನ ಕಳೆದರೂ ಪರಿಹಾರ ಸಿಗದಿದ್ದರೆ ವಿಶೇಷ ಅವಕಾಶ
ಈಗಾಗಲೇ ‘ಸಕಾಲ’ ಅಥವಾ ‘ಐಪಿಜಿಆರ್ಎಸ್’ ಮೂಲಕ ಅರ್ಜಿ ಸಲ್ಲಿಸಿ 21 ದಿನಗಳು ಕಳೆದಿದ್ದರೂ ಪರಿಹಾರ ಕಾಣದ ಪ್ರಕರಣಗಳಿಗೆ ಪ್ರಜಾಸೇವಾ ಸಭೆಗಳಲ್ಲಿ ಪ್ರತ್ಯೇಕ ಆದ್ಯತೆ (ಸರತಿ) ನೀಡಲಾಗುತ್ತದೆ. ನಾಗರಿಕರು ತಮ್ಮ ಹಳೆಯ ನೋಂದಣಿ ಸಂಖ್ಯೆ ಮತ್ತು ಸಂಬಂಧಿತ ದಾಖಲೆಗಳೊಂದಿಗೆ ಸಭೆಗೆ ನೇರವಾಗಿ ಹಾಜರಾಗಿ ನ್ಯಾಯ ಪಡೆಯಬಹುದಾಗಿದೆ
