ಬೆಂಗಳೂರು: ಹಲವು ವರ್ಷಗಳಿಂದ ಆಸ್ತಿ ತೆರಿಗೆ ಬಾಕಿ ಉಳಿಸಿಕೊಂಡಿರುವ ಆಸ್ತಿಗಳನ್ನು ಹರಾಜು ಹಾಕಲು ಬಿಬಿಎಂಪಿ ತೀರ್ಮಾನಿಸಿದೆ. ಈ ಪ್ರಕ್ರಿಯೆಗೆ ಡಿಸೆಂಬರ್‌ ಮೊದಲ ವಾರದಿಂದಲೇ ಚಾಲನೆ ಸಿಗಲಿದೆ.
ತೆರಿಗೆ ಬಾಕಿ ವಸೂಲಿಗೆ ಒಂಬತ್ತು ತಿಂಗಳ ಹಿಂದೆ ಪಾಲಿಕೆಯು ಒಂದು ಬಾರಿ ತೀರುವಳಿ (ಒನ್‌ ಟೈಮ್‌ ಸೆಟಲ್‌ಮೆಂಟ್‌) ಯೋಜನೆ ಪರಿಚಯಿಸಿತ್ತು. ಬಾಕಿ ಮೊತ್ತ ಪಾವತಿಸುವುದಾದಲ್ಲಿ ಬಡ್ಡಿ, ದಂಡ ಮನ್ನಾ ಮಾಡುವುದಾಗಿ ಘೋಷಿಸಲಾಗಿತ್ತು. ಬಾಕಿ ಪಾವತಿಸದಿದ್ದಲ್ಲಿ ಡಿಸೆಂಬರ್‌ನಿಂದ ದುಪ್ಪಟ್ಟು ತೆರಿಗೆಯನ್ನು ವಿಧಿಸುವ ಎಚ್ಚರಿಕೆಯನ್ನೂ ನೀಡಲಾಗಿದೆ. ಹೀಗಿದ್ದರೂ ಕೆಲ ಮಾಲೀಕರು ಆಸ್ತಿ ತೆರಿಗೆ ಪಾವತಿಸಲು ಮುಂದಾಗಿಲ್ಲ. ನ. 30ಕ್ಕೆ ಒಂದು ಬಾರಿ ತೀರುವಳಿ ಯೋಜನೆ ಅವಧಿ ಅಂತ್ಯವಾಗಿದ್ದು, ಕೊನೆಯ ಅಸ್ತ್ರವಾಗಿ ಪಾಲಿಕೆ ಹರಾಜು ಹಾಕುವ ಪ್ರಕ್ರಿಯೆ ಆರಂಭಿಸಲಿದೆ.
ನ. 23ರವರೆಗಿನ ಅಂಕಿ ಅಂಶದ ಪ್ರಕಾರ, 2.3 ಲಕ್ಷ ಮಾಲೀಕರು 365 ಕೋಟಿ ರೂ. ತೆರಿಗೆ ಬಾಕಿ ಉಳಿಸಿಕೊಂಡಿದ್ದಾರೆ (ಹಲವು ವರ್ಷಗಳಿಂದ ಬಾಕಿ ಉಳಿಸಿಕೊಂಡ ಆಸ್ತಿ ಮಾಲೀಕರು. ದೊಡ್ಡ ಮೊತ್ತದ ಆಸ್ತಿ ಬಾಕಿ ಉಳಿಸಿಕೊಂಡ ವಸತಿಯೇತರ ಕಟ್ಟಡಗಳನ್ನು ಆದ್ಯತೆ ಮೇಲೆ ಹರಾಜು ಹಾಕಲು ಉದ್ದೇಶಿಸಲಾಗಿದೆ. ಬಿಬಿಎಂಪಿ ಮೂಲಗಳ ಪ್ರಕಾರ, 20,000 ವಸತಿಯೇತರ ಆಸ್ತಿಗಳ ಮಾಲೀಕರು ಸುಮಾರು 150 ಕೋಟಿ ರೂ. ಆಸ್ತಿ ತೆರಿಗೆ ಬಾಕಿ ಉಳಿಸಿಕೊಂಡಿದ್ದಾರೆ.
ಬಿಬಿಎಂಪಿ ಕಾಯಿದೆ 2020 ಮತ್ತು ಬಿಬಿಎಂಪಿ ನಿಯಮ (ಆಸ್ತಿ ತೆರಿಗೆ ಅಂದಾಜು, ವಸೂಲಿ ಮತ್ತು ನಿರ್ವಹಣೆ) 2024ರ ಪ್ರಕಾರ ಬಾಕಿ ತೆರಿಗೆ, ಶುಲ್ಕ ಪಾವತಿಸದ ಆಸ್ತಿಯನ್ನು ಹರಾಜು ಹಾಕಲು ಅವಕಾಶವಿದೆ. ಖಾತೆ ಹೊಂದದ ಆಸ್ತಿಗಳ ಮಾಲೀಕರು ಖಾತೆಗಾಗಿ ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಬಹುದು. ಪ್ರಾವಿಶನಲ್‌ ಟ್ಯಾಕ್ಸ್‌ ನಂಬರ್‌ ಬಳಸಿ ತೆರಿಗೆ ಪಾವತಿಸಬಹುದಾಗಿದೆ.
ನಾಳೆಯಿಂದಲೇ ನೋಟಿಸ್ ಜಾರಿ: ತೆರಿಗೆ ಸುಸ್ತಿದಾರರಿಗೆ ಡಿ.2ರಿಂದ ಪಾಲಿಕೆಯು ನೋಟಿಸ್ ನೀಡಲಿದೆ. ಬಳಿಕ ಹರಾಜು ಪ್ರಕ್ರಿಯೆ ಆರಂಭಿಸಲಿದೆ. ಕೋರ್ಟ್‌ನಲ್ಲಿ ತಡೆಯಾಜ್ಞೆ ಇಲ್ಲದ ಆಸ್ತಿಗಳನ್ನು ಹರಾಜು ಹಾಕಲಾಗುವುದು ಎಂದು ಬಿಬಿಎಂಪಿ ಅಧಿಕಾರಿಗಳು ತಿಳಿಸಿದ್ದಾರೆ.
ಬಿಬಿಎಂಪಿ ಚುನಾವಣೆಗೆ ತೆರೆಮರೆಯಲ್ಲಿ ನಡೆಯುತ್ತಿದೆ ತಯಾರಿ: ಮಾರ್ಚ್ ಅಥವಾ ಏಪ್ರಿಲ್ನಲ್ಲಿ ಚುನಾವಣೆ
