Greater Bengaluru News9 : ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ಹೆಸರಿನ ಬದಲು ‘ಬೃಹತ್ ಬೆಂಗಳೂರು ಪ್ರಾಧಿಕಾರ’ ಎಂದು ಕನ್ನಡದಲ್ಲಿ ಮರುನಾಮಕರಣ ಮಾಡಬೇಕು ಎಂದು ಕರ್ನಾಟಕ ವಿಕಾಸ ರಂಗ ಒತ್ತಾಯಿಸಿದೆ.
ನಗರದ ವಿವಿಧ ರಸ್ತೆಗಳು, ಸರ್ಕಾರಿ ಕಚೇರಿಗಳು ಸೇರಿದಂತೆ ಸಾರ್ವಜನಿಕ ಸ್ಥಳಗಳಲ್ಲಿ GBA ಎಂಬ ಹೆಸರಿನ ಬಳಕೆ ಹೆಚ್ಚುತ್ತಿರುವುದರಿಂದ ಬೆಂಗಳೂರಿನ ಮೂಲ ಹೆಸರಿನ ಮಹತ್ವ ನಿಧಾನವಾಗಿ ಮರೆಯಾಗುತ್ತಿದೆ ಎಂದು ಸಂಘಟನೆ ಆತಂಕ ವ್ಯಕ್ತಪಡಿಸಿದೆ.
ಬೆಂಗಳೂರು ನಗರವನ್ನು ಕೆಂಪೇಗೌಡರು ನಿರ್ಮಿಸಿದ ಇತಿಹಾಸ ಮತ್ತು ಅದರ ಕನ್ನಡದ ಹೆಸರಿನೊಂದಿಗೆ ಜನರ ಭಾವನಾತ್ಮಕ ನಂಟಿದೆ. ಹೀಗಾಗಿ ನಗರದ ಆಡಳಿತ ವ್ಯವಸ್ಥೆಯ ಹೆಸರಿನಲ್ಲೂ ಕನ್ನಡ ಪದಕ್ಕೆ ಆದ್ಯತೆ ನೀಡಬೇಕು ಎಂದು ಕರ್ನಾಟಕ ವಿಕಾಸ ರಂಗದ ಅಧ್ಯಕ್ಷ ವ.ಚ. ಚನ್ನೇಗೌಡ ಹೇಳಿದ್ದಾರೆ.
ಗ್ರೇಟರ್ ಬೆಂಗಳೂರು ಅಥಾರಿಟಿ ಅಸ್ತಿತ್ವಕ್ಕೆ ಬಂದ ಬಳಿಕ ನಗರದ ಹಲವು ಕಡೆ GBA ಹೆಸರಿನ ಫಲಕಗಳು ಕಾಣಿಸಿಕೊಳ್ಳುತ್ತಿವೆ. ಇದೇ ರೀತಿಯ ಬಳಕೆ ಮುಂದುವರಿದರೆ, ಮುಂದಿನ ದಿನಗಳಲ್ಲಿ ‘ಬೆಂಗಳೂರು’ ಎಂಬ ಮೂಲ ಹೆಸರು ಸಾರ್ವಜನಿಕ ಬಳಕೆಯಲ್ಲಿ ಮತ್ತಷ್ಟು ಕಡಿಮೆಯಾಗುವ ಸಾಧ್ಯತೆಯಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
‘ಗ್ರೇಟರ್’ ಎಂಬ ಇಂಗ್ಲಿಷ್ ಪದದ ಬದಲಿಗೆ ‘ಬೃಹತ್’ ಎಂಬ ಕನ್ನಡ ಪದವನ್ನು ಬಳಸುವುದು ಸೂಕ್ತ. ಆದ್ದರಿಂದ GBAಗೆ ‘ಬೃಹತ್ ಬೆಂಗಳೂರು ಪ್ರಾಧಿಕಾರ’ ಎಂಬ ಹೆಸರನ್ನು ನೀಡುವಂತೆ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರನ್ನು ಭೇಟಿಯಾಗಿ ಮನವಿ ಸಲ್ಲಿಸಲಾಗುವುದು ಎಂದು ಚನ್ನೇಗೌಡ ತಿಳಿಸಿದ್ದಾರೆ.
ಬೆಂಗಳೂರಿನ ಐತಿಹಾಸಿಕ ಹಿನ್ನೆಲೆ, ಕನ್ನಡದ ಅಸ್ಮಿತೆ ಹಾಗೂ ನಗರದ ಮೂಲ ಹೆಸರಿನ ಸಂರಕ್ಷಣೆಗೆ ಸರ್ಕಾರ ಆದ್ಯತೆ ನೀಡಬೇಕು ಎಂಬುದು ಕರ್ನಾಟಕ ವಿಕಾಸ ರಂಗದ ಆಗ್ರಹವಾಗಿದೆ.
