ಗೋಲ್‌ಗಪ್ಪಾದ ರುಚಿ ಹೆಚ್ಚಿಸಲು ಟಾಯ್ಲೆಟ್‌ ಕ್ಲೀನರ್‌, ಯೂರಿಯಾ ಗೊಬ್ಬರ ಮಿಕ್ಸ್‌ ಮಾಡ್ತಾರಂತೆ ಎಚ್ಚರ! -

ನವದೆಹಲಿ: ಪಾನೀಪುರಿ ಅಥವಾ ಗೋಲ್‌ಗಪ್ಪಾ ಇವತ್ತಿನ ದಿನಗಳಲ್ಲಿ ಜನರು ಬಹಳ ಇಷ್ಟಪಟ್ಟು ತಿನ್ನುವ ಚಾಟ್ಸ್‌. ಪೂರಿ ಹಾಗೂ ಬಟಾಣಿ, ಆಲೂಗಡ್ಡೆ, ಮಸಾಲೆ ಸೇರಿದ ಸ್ಟಫಿಂಗ್‌. ಜೊತೆಗೆ ಖಾರ ಖಾರವಾದ ಪಾನೀಯವನ್ನು ಕುಡಿದು ಆನಂದಿಸುತ್ತಾರೆ. ಇದು ಆರೋಗ್ಯಕ್ಕೆ ಒಳ್ಳೆಯದಲ್ಲ. ಇದನ್ನು ತಯಾರಿಸುವ ರೀತಿ ಸರಿಯಾಗಿರುವುದಿಲ್ಲ ಎಂದು ಅದೆಷ್ಟೋ ಆರೋಗ್ಯ ತಜ್ಞರು ಎಚ್ಚರಿಸಿದರೂ ಗೋಲ್‌ಗಪ್ಪಾ ತಿನ್ನುವವರ ಸಂಖ್ಯೆಯಂತೂ ಕಡಿಮೆಯಾಗುವುದಿಲ್ಲ. ಇತ್ತೀಚಿಗೆ ಇಬ್ಬರು ವ್ಯಕ್ತಿಗಳು ಬರಿಗಾಲಿನಲ್ಲಿ ಗೋಲ್‌ಗಪ್ಪಾ ಹಿಟ್ಟು ಮಿಕ್ಸ್‌ ಮಾಡುತ್ತಿರುವ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು.

गुपचुप खाने वाले हो जाएं सावधान! झारखण्ड के गढ़वा का वीडियो सोशल मीडिया पर वायरल
पुलिस ने किया है गिरफ्तार.. जांच जारी #JharkhandNews #Gadwa #Jharkhand pic.twitter.com/0hvOL1tVvT

— Dhananjay Mandal (@dhananjaynews) October 17, 2024

ಇದರ ಬೆನ್ನಲ್ಲೇ ಗೋಲ್‌ಗಪ್ಪಾಗೆ ಟಾಯ್ಲೆಟ್‌ ಕ್ಲೀನರ್‌ ಬಳಸ್ತಿರೋ ವಿಚಾರ ವಿವಾದಕ್ಕೆ ಕಾರಣವಾಗಿದೆ. ಪೊಲೀಸರ ತನಿಖೆಯ ವೇಳೆ, ರುಚಿ ಹೆಚ್ಚಿಸಲು ಟಾಯ್ಲೆಟ್ ಕ್ಲೀನರ್ ಹಾರ್ಪಿಕ್ ಮತ್ತು ಯೂರಿಯಾ ಗೊಬ್ಬರವನ್ನು ಹಿಟ್ಟಿನಲ್ಲಿ ಬೆರೆಸಿದ್ದನ್ನು ಆರೋಪಿ ಒಪ್ಪಿಕೊಂಡಿದ್ದಾನೆ. ಪೊಲೀಸರು ಅಂಗಡಿ ಮಾಲೀಕರನ್ನು ವಶಕ್ಕೆ ಪಡೆದು ಅಂಗಡಿಗೆ ಸೀಲ್ ಹಾಕಿದ್ದಾರೆ. ಈ ಬಗ್ಗೆ ತನಿಖೆ ನಡೆಯುತ್ತಿದೆ.

ಜಾರ್ಖಂಡ್‌ನ ಗರ್ವಾ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದ್ದು, ವೈರಲ್‌ ಆಗಿರೋ ವೀಡಿಯೋದಲ್ಲಿ ಇಬ್ಬರು ಪುರುಷರು ತಮ್ಮ ಕಾಲುಗಳಿಂದ ಗೋಲ್ಗಪ್ಪಿನ ಹಿಟ್ಟನ್ನು ಬೆರೆಸುವುದನ್ನು ಕಾಣಬಹುದು. ಪ್ಯಾಕ್ ಮಾಡಿದ ಗೋಲ್‌ಗಪ್ಪಾಗಳು ಕೂಡಾ ಅಲ್ಲೇ ಪಕ್ಕದಲ್ಲಿ ಬಿದ್ದಿರುವುದನ್ನು ವೀಡಿಯೋದಲ್ಲಿ ನೋಡಬಹುದು. ವೀಡಿಯೋ ವೈರಲ್‌ ಆದ ಕೂಡಲೇ ಜನರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಅಂಗಡಿ ಮಾಲೀಕರನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡ ನಂತರ ಶಂಕಿತ ಆರೋಪಿಗಳು ಗೋಲಗಪ್ಪಾ ಹಿಟ್ಟಿಗೆ ಟಾಯ್ಲೆಟ್ ಕ್ಲೀನರ್ ಹಾರ್ಪಿಕ್ ಮತ್ತು ಯೂರಿಯಾ ಗೊಬ್ಬರವನ್ನು ಸೇರಿಸಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾರೆ. ಬಿಳಿ ಹರಳೆಣ್ಣೆಯನ್ನು ಹೋಲುವ ಶಂಕಾಸ್ಪದ ವಸ್ತುವೊಂದು ಪೊಲೀಸರಿಗೆ ತಪಾಸಣೆ ವೇಳೆ ಪತ್ತೆಯಾಗಿದ್ದು, ಅದನ್ನು ಪರೀಕ್ಷೆಗೆ ಕಳುಹಿಸಲಾಗಿದೆ. ಆರೋಪಿಗಳಿಂದ ವಶಪಡಿಸಿಕೊಂಡ ವಸ್ತುಗಳನ್ನು ತನಿಖೆಗೆ ಕಳುಹಿಸಲಾಗಿದೆ.

ಆಹಾರ ಸುರಕ್ಷತಾ ಅಧಿಕಾರಿಗಳು ಇತ್ತೀಚಿಗೆ ಕರ್ನಾಟಕದಲ್ಲಿ ಪಾನಿ ಪುರಿಯ ಮಾದರಿಗಳನ್ನು ಪರೀಕ್ಷಿಸಿದ ಬಳಿಕ ಆಘಾತಕಾರಿ ಫಲಿತಾಂಶಗಳನ್ನು ಕಂಡುಕೊಂಡಿದ್ದಾರೆ. ಅಧಿಕಾರಿಗಳು ಸಂಗ್ರಹಿಸಿದ ಪಾನಿ ಪುರಿ ಮಾದರಿಗಳಲ್ಲಿ 22% ಸುರಕ್ಷತಾ ಮಾನದಂಡಗಳನ್ನು ವಿಫಲಗೊಳಿಸಲಾಗಿದೆ ಎಂದು ತಿಳಿದುಬಂದಿದೆ. ಸಂಗ್ರಹಿಸಿದ 260 ಮಾದರಿಗಳಲ್ಲಿ 41 ಮಾದರಿಗಳಲ್ಲಿ ಕೃತಕ ಬಣ್ಣಗಳು ಮತ್ತು ಕ್ಯಾನ್ಸರ್‌ಗೆ ಕಾರಣವಾಗುವ ಕಾರ್ಸಿನೋಜೆನಿಕ್ ಏಜೆಂಟ್‌ (carcinogenic agent)ಕಂಡುಬಂದಿದೆ. ಉಳಿದಂತೆ ಇತರೆ 18 ಮಾದರಿಗಳು ಮಾನವ ತಿನ್ನಲೇಬಾರದು ಅನ್ನೋವಷ್ಟು ವಿಷಕಾರಿ ಆಗಿದೆ. ಈ ನಡುವೆ ಆಹಾರ ಸುರಕ್ಷತಾ ಆಯುಕ್ತ ಶ್ರೀನಿವಾಸ್ ಕೆ ಅವರು ಮಾಧ್ಯಮವೊಂದಕ್ಕೆ ಪರತಿಕ್ರಿಯೆ ನೀಡಿ, ರಾಜ್ಯದಾದ್ಯಂತ ಬೀದಿ ಬದಿಯಲ್ಲಿ ಮಾರಾಟ ಮಾಡುವ ಪಾನಿ ಪುರಿಯ ಗುಣಮಟ್ಟದ ಬಗ್ಗೆ ನಮಗೆ ಸಾಕಷ್ಟು ದೂರುಗಳು ಬಂದಿದ್ದವು.

ನಾವು ರಸ್ತೆ ಬದಿಯ ಸ್ಟಾಲ್‌ಗಳಿಂದ ಹಾಗೂ ರೆಸ್ಟೋರೆಂಟ್‌ಗಳಿಂದ ಮಾದರಿಗಳನ್ನು ಸಂಗ್ರಹಿಸಿದ್ದೇವೆ. ಅನೇಕ ಸ್ಯಾಂಪಲ್‌ಗಳಲ್ಲಿ ಕೆಲವು ತಂಗಳು ಪದಾರ್ಥವಾಗಿದ್ದರೆ, ಇನ್ನೂ ಕೆಲವು ಸ್ಯಾಂಪಲ್‌ಗಳಲ್ಲಿ ನೀಲಿ. ಹಳದಿ ಹಾಗೂ ಇನ್ನಿತರೆ ಕಲರ್‌ನ ರಾಸಾಯನಿಕ ಕಂಡುಬಂದಿದೆ. ಇವು ವಿವಿಧ ರೀತಿಯ ಆರೋಗ್ಯ ಸಮಸ್ಯೆಗಳನ್ನು ಉಂಟು ಮಾಡಬಹುದು ಎಂದು ತಿಳಿಸಲಾಗಿದೆ.