ಸೆಪ್ಟೆಂಬರ್ 7 ರಂದು ಚಂದ್ರ ಗ್ರಹಣ ಹಿನ್ನೆಲೆ ಭಾರತದ ಅತ್ಯಂತ ಪವಿತ್ರ ಹಿಂದು ಕ್ಷೇತ್ರಗಳಲ್ಲಿ ಒಂದಾದ ವಿಶ್ವ ಪ್ರಸಿದ್ಧ ತಿರುಮಲ ತಿರುಪತಿ ದೇವಸ್ಥಾನದ ಬಾಗಿಲು 12 ಗಂಟೆಗಳ ಕಾಲ ಮುಚ್ಚಲಾಗುತ್ತದೆ.
ಟಿಟಿಡಿ (ತಿರುಮಲ ತಿರುಪತಿ ದೇವಸ್ಥಾನಂ) ಪ್ರಕಾರ, ಚಂದ್ರ ಗ್ರಹಣವು ರಾತ್ರಿ 9:30 ರಿಂದ ಮಧ್ಯರಾತ್ರಿ 1.31 ರವರೆಗೆ ಇರಲಿದೆ. ಆದ್ದರಿಂದ, ಸೆಪ್ಟೆಂಬರ್ 7 ರಂದು ಮಧ್ಯಾಹ್ನ 3.50 ರಿಂದ ದೇವಾಲಯವನ್ನು ಮುಚ್ಚಲಾಗುತ್ತದೆ.
ಸೆಪ್ಟೆಂಬರ್ 8 ರಂದು ಬೆಳಗ್ಗೆ 3 ಗಂಟೆಗೆ ಮತ್ತೆ ತೆರೆಯಲಾಗುತ್ತದೆ. ಭಕ್ತರಿಗೆ ಬೆಳಗ್ಗೆ 6 ಗಂಟೆಯಿಂದ ದರ್ಶನಕ್ಕೆ ಅವಕಾಶ ನೀಡಲಾಗುತ್ತದೆ. ಇನ್ನು ಗ್ರಹಣದ ಅವಧಿಯಲ್ಲಿ ಉಂಜಲ್ ಸೇವೆ, ಅರ್ಜಿತ ಬ್ರಹ್ಮೋತ್ಸವ ಹಾಗೂ ಸಹಸ್ರ ದೀಪಾಲಂಕಾರ ಸೇವೆಗಳನ್ನು ರದ್ದುಗೊಳಿಸಲಾಗಿದೆ.
ಇದರೊಂದಿಗೆ ಅನ್ನಪ್ರಸಾದ ವಿತರಣೆ ಕೂಡ ಮಧ್ಯಾಹ್ನ 3 ಗಂಟೆಯಿಂದ ನಿಲ್ಲಿಸಲಾಗುತ್ತದೆ ಮತ್ತು ಸೆ.8ರಂದು ಬೆಳಗ್ಗೆ 8.30 ಕಕ್ಕೆ ಅನ್ನಪ್ರವಾದ ಮತ್ತೆ ಆರಂಭವಾಗುತ್ತದೆ. ಈ ಅವಧಿಯ ನಡುವೆ ಭಕ್ತರಿಗೆ ಸುಮಾರು 30,000 ಪುಳಿಯೋಗರೆ ಪ್ಯಾಕೆಟ್ಗಳನ್ನು ಒದಗಿಸಲಾಗುವುದು ಎಂದು ಟಿಟಿಡಿ ಮಾಹಿತಿ ನೀಡಿದೆ.
ಚಂದ್ರಗ್ರಹಣ
ಅಂದಹಾಗೆ, 2025 ರಲ್ಲಿ ಎರಡನೇ ಮತ್ತು ಕೊನೆಯ ಚಂದ್ರಗ್ರಹಣವು ಸೆಪ್ಟೆಂಬರ್ 7 ಮತ್ತು 8ರ ನಡುವೆ ಸಂಭವಿಸಲಿದೆ. ಇದು ಒಂದು ಪೂರ್ಣ ಚಂದ್ರಗ್ರಹಣ ಆಗಿದ್ದು, ಭಾರತ ಸೇರಿದಂತೆ ಏಷ್ಯಾ, ಯುರೋಪ್, ಆಫ್ರಿಕಾ, ಆಸ್ಟ್ರೇಲಿಯಾ ಮತ್ತು ಇತರ ಪ್ರದೇಶಗಳಲ್ಲಿ ಗೋಚರವಾಗಲಿದೆ. ಈ ಗ್ರಹಣವು ಭಾದ್ರಪದ ಶುಕ್ಲ ಪಕ್ಷದ ಪೂರ್ಣಿಮೆಯಂದು ಸಂಭವಿಸಲಿದೆ ಮತ್ತು ಚಂದ್ರನು “ರಕ್ತ ಚಂದ್ರ” ರೂಪದಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆಯಿದೆ, ಏಕೆಂದರೆ ಭೂಮಿಯ ವಾತಾವರಣದಿಂದ ಕೆಂಪು ಬೆಳಕು ಚಂದ್ರನ ಮೇಲೆ ಬೀಳುತ್ತದೆ.
ಗ್ರಹಣದ ಸಮಯ ಮತ್ತು ಗೋಚರತೆ
* ಗ್ರಹಣ ಆರಂಭ: ಸೆಪ್ಟೆಂಬರ್ 7, 2025, ರಾತ್ರಿ 9:58 PM
* ಪೂರ್ಣ ಗ್ರಹಣ ಆರಂಭ: ರಾತ್ರಿ 11:00 PM
* ಗರಿಷ್ಠ ಗ್ರಹಣ: ರಾತ್ರಿ 11:41 PM
* ಪೂರ್ಣ ಗ್ರಹಣ ಮುಕ್ತಾಯ: ಸೆಪ್ಟೆಂಬರ್ 8, 12:22 AM
* ಗ್ರಹಣ ಮುಕ್ತಾಯ: ಸೆಪ್ಟೆಂಬರ್ 8, 1:26 AM
* ಒಟ್ಟು ಅವಧಿ: ಸುಮಾರು 3.5 ಗಂಟೆಗಳು
ಗೋಚರತೆ: ಭಾರತದ ಬಹುತೇಕ ಭಾಗಗಳಲ್ಲಿ, ಚೀನಾ, ಜಪಾನ್, ಆಗ್ನೇಯ ಏಷ್ಯಾ, ಆಸ್ಟ್ರೇಲಿಯಾ, ಆಫ್ರಿಕಾ ಮತ್ತು ಯುರೋಪ್ನ ಕೆಲವು ಭಾಗಗಳಲ್ಲಿ ಗೋಚರವಾಗಲಿದೆ.
ಸೂತಕ ಕಾಲ
ಹಿಂದೂ ಸಂಪ್ರದಾಯದಲ್ಲಿ, ಚಂದ್ರಗ್ರಹಣದ ಮೊದಲು ಸೂತಕ ಕಾಲ ಎಂಬ ಅಶುಭ ಸಮಯವನ್ನು ಗಮನಿಸಲಾಗುತ್ತದೆ, ಇದು ಗ್ರಹಣಕ್ಕೆ 9 ಗಂಟೆಗಳ ಮೊದಲು ಆರಂಭವಾಗುತ್ತದೆ.
ಸೂತಕ ಆರಂಭ: ಸೆಪ್ಟೆಂಬರ್ 7, 2025, ಮಧ್ಯಾಹ್ನ 12:57 PM
ಸೂತಕ ಮುಕ್ತಾಯ: ಗ್ರಹಣ ಮುಕ್ತಾಯದ ನಂತರ, ರಾತ್ರಿ 1:26 AM (ಸೆಪ್ಟೆಂಬರ್ 8)
