ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ಬಹುನಿರೀಕ್ಷಿತ ಬೆಂಗಳೂರು ನಮ್ಮ ಮೆಟ್ರೋ ನೀಲಿ ಮಾರ್ಗದ ಕಾಮಗಾರಿ ಅರ್ಧದಷ್ಟು ಪೂರ್ಣವಾಗಿದೆ. ಅಂದುಕೊಂಡಂತೆ ಇನ್ನರ್ಧ ಕಾಮಗಾರಿಯೂ ನಿಗದಿ ಸಮಯದಲ್ಲಿ ಮುಗಿದರೆ 2026 ಅಂತ್ಯಕ್ಕೆ ಈ ಯೋಜನೆಯು ಪೂರ್ಣವಾಗಲಿದೆ.
ಸದ್ಯ ಬೆಂಗಳೂರಿನಲ್ಲಿ ಉತ್ತರ ಭಾಗದಿಂದ ದಕ್ಷಿಣಕ್ಕೆ ಹಸಿರು ಮಾರ್ಗ, ಪೂರ್ವದಿಂದ ಪಶ್ಚಿಮಕ್ಕೆ ನೇರಳೆ ಮಾರ್ಗವು ಮೆಟ್ರೋ ಸಂಪರ್ಕ ಕಲ್ಪಿಸುತ್ತಿದೆ. ಮುಂದಿವರೆದು ದಕ್ಷಿಣ ಬೆಂಗಳೂರಿನಲ್ಲಿ ಹಳದಿ ಮಾರ್ಗ, ಬನ್ನೇರುಘಟ್ಟದಿಂದ ನಾಗಾವರ ನಡುವೆ ಗುಲಾಬಿ ಮಾರ್ಗ ಶೀಘ್ರದಲ್ಲಿಯೇ ಆರಂಭವಾಗುತ್ತಿದೆ. ಇನ್ನು ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ನೀಲಿ ಮಾರ್ಗಕ್ಕೆ ಪ್ರಯಾಣಿಕರು ಎದುರು ನೋಡುತ್ತಿದ್ದಾರೆ.
ಬೆಂಗಳೂರು ವಿಮಾನ ನಿಲ್ದಾಣಕ್ಕೆ ಸಂಪರ್ಕಿಸುವ ನಮ್ಮ ಮೆಟ್ರೋದ 58.19 ಕಿ.ಮೀ ವಿಸ್ತೀರ್ಣದ ನೀಲಿ ಮಾರ್ಗವನ್ನು 2 ಹಂತದಲ್ಲಿ ನಿರ್ಮಾಣ ಮಾಡಲಾಗುತ್ತಿದೆ. ಮೊದಲನೇ ಹಂತ 2 ಎ ಇದು ಸಿಲ್ಕ್ಬೋರ್ಡ್ನಿಂದ ಕೆಆರ್ ಪುರಂಗೆ ಸಂಪರ್ಕ ಕಲ್ಪಿಸುತ್ತದೆ. 2 ಬಿ ಕೆಆರ್ ಪುರಂನಿಂದ ವಿಮಾನ ನಿಲ್ದಾಣಕ್ಕೆ ಸಂಪರ್ಕಿಸುತ್ತದೆ. ಒಟ್ಟು 31 ನಿಲ್ದಾಣಗಳಿರಲಿವೆ.
ಕಾಮಗಾರಿ ಎಲ್ಲಿಗೆ ಬಂತು?
ನಮ್ಮ ಮೆಟ್ರೋ ನೀಲಿ ಮಾರ್ಗದ ಕಾಮಗಾರಿ ಸದ್ಯ ಹೆಚ್ಚು ಕಡಿಮೆ ಅರ್ಧದಷ್ಟು (ಶೇಕಡಾ 45) ಪೂರ್ಣವಾಗಿದೆ. ಸದ್ಯ ವಿಮಾನ ನಿಲ್ದಾಣದಿಂದ ಹೆಬ್ಬಾಳವರೆಗೂ ಕಾಮಗಾರಿ ವೇಗವಾಗಿ ನಡೆಯುತ್ತಿದೆ. ಉಳಿದಂತೆ ಹೆಬ್ಬಾಳದಿಂದ ಕೆಆರ್ ಪುರಂವರೆಗೂ, ಕೆಆರ್ ಪುರಂನಿಂದ ಸರ್ಜಾಪುರದವರೆಗೂ ನಡೆಯುತ್ತಿದೆ. ಮೊದಲಿಗೆ ಹೆಬ್ಬಾಳದಿಂದ ಏರ್ಪೋರ್ಟ್ಗೆ ಕಾಮಗಾರಿ ಪೂರ್ಣಗೊಳಿಸಿ ಸಂಚಾರ ಆರಂಭಿಸಬಹುದು ಎನ್ನಲಾಗಿದೆ.
ಯಾವೆಲ್ಲಾ ನಿಲ್ದಾಣ?
* ಕೆ.ಆರ್. ಪುರ
* ಕಸ್ತೂರಿ ನಗರ
* ಹೊರಮಾವು
* ಎಚ್.ಆರ್.ಬಿ.ಆರ್ ಲೇಔಟ್
* ಕಲ್ಯಾಣ್ ನಗರ
* ಎಚ್.ಬಿ.ಆರ್ ಲೇಔಟ್
* ನಾಗವಾರ
* ವೀರಣ್ಣ ಪಾಳ್ಯ
* ಕೆಂಪಾಪುರ
* ಹೆಬ್ಬಾಳ
* ಕೊಡಿಗೇಹಳ್ಳಿ
* ಜಕ್ಕೂರು ಕ್ರಾಸ್
* ಯಲಹಂಕ
* ಬಾಗಲೂರು ಕ್ರಾಸ್
* ಬೆಟ್ಟಹಲಸೂರು
* ದೊಡ್ಡಜಾಲ
* ವಿಮಾನ ನಿಲ್ದಾಣ ನಗರ
* ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಟರ್ಮಿನಲ್
ನೀಲಿ ಮಾರ್ಗ 2ಎ
* ಸೆಂಟ್ರಲ್ ಸಿಲ್ಕ್ ಬೋರ್ಡ್
* ಎಚ್.ಎಸ್.ಆರ್ ಲೇಔಟ್
* ಅಗಾರ
* ಇಬ್ಬಲೂರು
* ಬೆಳ್ಳಂದೂರು
* ಕಾಡುಬೀಸನಹಳ್ಳಿ
* ಕೋಡಿಬೀಸನಹಳ್ಳಿ
* ಮಾರತಹಳ್ಳಿ
* ಇಸ್ರೋ
* ದೊಡ್ಡನೆಕುಂದಿ
* ಡಿ.ಆರ್.ಡಿ.ಓ ಕ್ರೀಡಾ ಸಂಕೀರ್ಣ
* ಸರಸ್ವತಿ ನಗರ
* ಕೆ.ಆರ್. ಪುರ
37 ರೈಲುಗಳು
ಭಾರತ್ ಅರ್ಥ್ ಮೂವರ್ಸ್ ಲಿ. ಎಂಬ ಕಂಪನಿಯು ನೀಲಿ ಹಾಗೂ ಗುಲಾಬಿ ಮಾರ್ಗಕ್ಕೆ ರೈಲುಗಳನ್ನು (318 ಬೋಗಿ) ಪೂರೈಸಲಿದೆ. ಈ ಪೈಕಿ ಆರು ಬೋಗಿಗಳ 16 ರೈಲು ಕೇಂದ್ರ ರೇಷ್ಮೆ ಮಂಡಳಿಯಿಂದ ಕೆ.ಆರ್.ಪುರ ಹಾಗೂ ಆರು ಬೋಗಿಗಳ 21 ರೈಲುಗ ಳನ್ನು ಕೆ.ಆರ್.ಪುರ-ವಿಮಾನ ನಿಲ್ದಾಣ ಮಾರ್ಗಕ್ಕೆ ನಿಯೋಜನೆ ಆಗಿವೆ. 2025 ರ ಡಿಸೆಂಬರ್ನಿಂದ ಈ ಮಾರ್ಗಗಳಿಗೆ ರೈಲು ಪೂರೈಸುವ ಸಂಬಂಧ ಆಗಿದೆ.
ನೀಲಿ ಮಾರ್ಗದ ವೆಚ್ಚ ಎಷ್ಟು?
ನೀಲಿ ಮಾರ್ಗದ ಒಟ್ಟಾರೆ ವೆಚ್ಚ 10,584 ಕೋಟಿ ರೂಪಾಯಿ.
ಯಾವಾಗ ಆರಂಭವಾಗಬಹುದು?
ಸದ್ಯ ಬಿಎಂಆರ್ಸಿಎಲ್ ಅಧಿಕಾರಿಗಳ ಮಾಹಿತಿಯಂತೆ, 2026 ಕೊನೆಗೆ ನಮ್ಮ ಮೆಟ್ರೋ ನೀಲಿ ಮಾರ್ಗ ಆರಂಭವಾಗಲಿದೆ. ಒಂದು ವೇಳೆ ಕಾಮಗಾರಿಗಳು ತಡವಾದರೆ 2027 ರಲ್ಲಿ ನಿಶ್ಚಿತವಾಗಿ ಆರಂಭವಾಗಲಿದೆ.
ನೀಲಿ ಮಾರ್ಗದ ಅನುಕೂಲಗಳೇನು?
ವಿಮಾನ ನಿಲ್ದಾಣ ರಸ್ತೆಯ ವಾಹನ ಸಂಚಾರ ದಟ್ಟಣೆಯನ್ನು ತಗ್ಗಿಸಬಹುದು.
ನಗರ – ಏರ್ಪೋರ್ಟ್ ನಡುವಿನ ಸಂಚಾರ ಸಮಯ ಶೇಕಡಾ 30 ರಿಂದ 40 ರಷ್ಟು ಉಳಿಸಬಹುದು.
ಹೆಬ್ಬಾಳ ಕೆಆರ್ ಪುರಂ ರಸ್ತೆಯ ವಾಹನ ಸಂಚಾರ ಪ್ರಮಾಣವನ್ನು ಶೇಕಡಾ 30 ರಷ್ಟು ತಗ್ಗಿಸಬಹುದು.
ಮಾನ್ಯತಾ ಟೆಕ್ಪಾರ್ಕ್ ಸೇರಿದಂತೆ ವಿವಿಧ ಐಟಿ ಕಂಪನಿಗಳಿಗೆ ಸಾರಿಗೆ ಸಂಪರ್ಕ ಸುಲಭವಾಗಲಿದೆ.
ಸಿಲ್ಕ್ಬೋರ್ಡ್ ಟ್ರಾಫಿಕ್ ಸಮಸ್ಯೆಯು ತಗ್ಗಲಿದೆ.
ನಗರದಲ್ಲಿ ಮೆಟ್ರೋ ಜಾಲವು 58 ಕಿ.ಮೀ ವಿಸ್ತರಣೆಯಾಗಲಿದೆ.
ಲೈಸೆನ್ಸ್ ಕ್ಯಾನ್ಸಲ್ ಆದ ಬೆನ್ನಲ್ಲೇ ಪೊಲೀಸರಿಗೆ ತನ್ನ 2 ಗನ್ಗಳನ್ನು ಸರೆಂಡರ್ ಮಾಡಿದ ದರ್ಶನ್!
