ನವದೆಹಲಿ: ಸೈಬರ್ ಅಪರಾಧ ತಡೆಗೆ ಸರ್ಕಾರ, ಪೊಲೀಸರು ಹೊಸ ಹೊಸ ತಂತ್ರಜ್ಞಾನ ಅಳವಡಿಸಿಕೊಳ್ಳುತ್ತಿರುವ ಬೆನ್ನಲ್ಲೇ ಸೈಬರ್ ಖದೀಮರೂ ಸಹ ವಂಚನೆಗೆ ಹೊಸ ವರಸೆ ಆರಂಭಿಸಿದ್ದಾರೆ. ಡಿಜಿಟಲ್ ಅರೆಸ್ಟ್ ಕೇಸ್ಗಳು ಮಿತಿಮೀರಿರುವ ಸಂದರ್ಭದಲ್ಲೇ ಬ್ಯಾಂಕ್ ಖಾತೆಗಳನ್ನು ಗುರಿಯಾಗಿಸುವ ಹೊಸ ಮಾಲ್ವೇರ್ ಸಕ್ರಿಯವಾಗುತ್ತಿದೆ.
ಹೌದು, ಟಾಕ್ಸಿಕ್ ಪಾಂಡ ಎಂದು ಕರೆಯಲ್ಪಡುವ ಈ ಮಾಲ್ವೇರ್ ಮೊಬೈಲ್ ಅಪ್ಲಿಕೇಶನ್ಗಳು ಮತ್ತು ಗೂಗಲ್ ಕ್ರೋಮ್ನಂತಹ ಅಪ್ಲಿಕೇಶನ್ಗಳ ನಕಲಿ ಆವೃತ್ತಿಗಳನ್ನು ಸೃಷ್ಟಿಸುವ ಮೂಲಕ ನಿಮ್ಮ ಫೋನ್ಗಳನ್ನು ಪ್ರವೇಶಿಸಬಹುದು. ಈ ಡೇಂಜರಸ್ ಪಾಂಡ ಮಾಲ್ವೇರ್ ಅನ್ನು ಕ್ಲೀಫಿ ಥ್ರೆಟ್ ಇಂಟೆಲಿಜೆನ್ಸ್ ಎಂಬ ಸೈಬರ್ ಭದ್ರತಾ ಸಂಸ್ಥೆ ಕಂಡುಹಿಡಿದಿದೆ.
ಗೂಗಲ್ ಪ್ಲೇ ಸ್ಟೋರ್ನಂತಹ ಅಧಿಕೃತ ಆ್ಯಪ್ ಸ್ಟೋರ್ಗಳನ್ನು ಬಿಟ್ಟು ಥರ್ಡ್ ಪಾರ್ಟಿ ಆ್ಯಪ್ಗಳನ್ನು ಡೌನ್ಲೋಡ್ ಮಾಡಿದಾಗ ಅದರ ಮೂಲಕ ಈ ಪಾಂಡ ಮಾಲ್ವೇರ್ ನಿಮ್ಮ ಫೋನ್ ಅನ್ನು ಸೇರುತ್ತದೆ. ಇಂತಹ ಮಾಲ್ವೇರ್ಗಳ ಮುಖ್ಯ ಉದ್ದೇಶವೇನೆಂದರೆ ಅಂಡ್ರಾಯ್ಡ್ ಫೋನ್ಗಳಿಂದ ಖಾತೆ ಟಾಕ್ಓವರ್ ಮತ್ತು ಆನ್-ಡಿವೈಸ್ ವಂಚನೆಯ ಮೂಲಕ ಹಣವನ್ನು ವರ್ಗಾಯಿಸುವುದು. TGToxic ಎಂಬ ಮಾಲ್ವೇರ್ ವರ್ಗದಿಂದ ಇದನ್ನು ರಚಿಸಲಾಗಿದೆ.
ಈ ಟಾಕ್ಸಿಕ್ ಪಾಂಡ ನಿಮ್ಮ ಬ್ಯಾಂಕಿನ ಭದ್ರತಾ ವ್ಯವಸ್ಥೆಗಳನ್ನೇ ಬೈಪಾಸ್ ಮಾಡಿ, ಖಾತೆಯಿಂದ ಹಣ ಎಗರಿಸುತ್ತದೆ. ಈ ಮಾಲ್ವೇರ್ನಲ್ಲಿ ನಿಮ್ಮ ಗುರುತಿನ ಪರಿಶೀಲನೆ ಮತ್ತು ದೃಢೀಕರಣ, ಹಾಗೆಯೇ ನಿಮ್ಮ ನಗದು ವಹಿವಾಟುಗಳನ್ನು ಪತ್ತೆ ಹಚ್ಚುವ ತಂತ್ರಗಳಿವೆ. ನಿಮ್ಮ ಖಾತೆಯಿಂದ ಹಣವನ್ನು ಹಿಂಪಡೆಯುವಾಗ OTP ಸಂದೇಶ ಸ್ವೀಕರಿಸುವುದನ್ನು ಸಹ ಇದು ತಪ್ಪಿಸಬಹುದು.
ಇನ್ನು ಈ ಮಾಲ್ವೇರ್ ಹಿಂದೆ ಯಾರಿದ್ದಾರೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ, ಇದನ್ನು ಹಾಂಗ್ಕಾಂಗ್ನಲ್ಲಿ ರೂಪಿಸಲಾಗಿದೆ ಎನ್ನಲಾಗುತ್ತಿದೆ. ಈ ಟಾಕ್ಸಿಕ್ ಪಾಂಡ ಅಂಡ್ರಾಯ್ಡ್ ಫೋನ್ಗಳಲ್ಲಿ ಸುಲಭವಾಗಿ ಪ್ರವೇಶಿಸುತ್ತವೆ. ಈ ಮಾಲ್ವೇರ್ ಮೂಲಕ ನಿಮ್ಮ ಫೋನ್ ಅನ್ನು ಬೇರೆ ಸ್ಥಳದಿಂದ ನಿಯಂತ್ರಿಸಲು ಸಾಧ್ಯವಿದೆ. ಇಂತಹ ಮಾಲ್ವೇರ್ಗಳನ್ನು ಪರಿಚಯಿಸುವ ಮೂಲಕ ವಂಚಕರು, ನಿಮ್ಮ ಬ್ಯಾಂಕ್ ಖಾತೆಯಿಂದ ಹಣ ಎಗರಿಸುತ್ತಾರೆ ಹುಶಾರ್!
ಇಂತಹ ಮಾಲ್ವೇರ್ಗಳಿಂದ ನಿಮ್ಮ ಬ್ಯಾಂಕ್ ಖಾತೆಯನ್ನು ರಕ್ಷಣೆ ಮಾಡಲು ಬಯಸುವುದಾದರೆ, ಗೂಗಲ್ ಪ್ಲೇಸ್ಟೋರ್ನಂತಹ ಅಧಿಕೃತ ಆ್ಯಪ್ ಸ್ಟೋರ್ಗಳನ್ನು ಬಿಟ್ಟು ಬೇರೆ ಯಾವುದೇ ಥರ್ಡ್ ಪಾರ್ಟಿ ಆ್ಯಪ್ಗಳನ್ನು ಡೌನ್ಲೋಡ್ ಮಾಡುವ ಪ್ರಯತ್ನವನ್ನು ಸಹ ಮಾಡಬೇಡಿ. ನಿಮ್ಮ ಭದ್ರತಾ ವ್ಯವಸ್ಥೆಯನ್ನು ಆಗಾಗ ಅಪ್ಡೇಟ್ ಮಾಡುತ್ತಿರಿ. ಯಾವುದೇ ಮೊಬೈಲ್ ಕಂಪನಿ ಅಪ್ಡೇಟ್ಗಳನ್ನು ಪರಿಚಯಿಸಿದರೆ ತಕ್ಷಣವೇ ಅಪ್ಡೇಟ್ ಮಾಡಿಕೊಳ್ಳಿ. ಅನವಶ್ಯಕ ಲಿಂಕ್ಗಳ ಮೇಲೆ ಕ್ಲಿಕ್ ಮಾಡದಿರಿ. ನಿಮ್ಮ ಮೊಬೈಲ್ಗೆ ಬರುವ ಮೆಸೇಜ್ಗಳ ಮೇಲೆಯೂ ನಿಗಾ ಇಡಿ. ಅನಗತ್ಯ ಮೆಸೇಜ್ಗಳಿಗೆ ಪ್ರತಿಕ್ರಿಯಿಸಬೇಡಿ. ಇದನ್ನು ಅನುಸರಿಸಿದರೆ ಮಾತ್ರ ಪಾಂಡ ಮಾಲ್ವೇರ್ ದಾಳಿಯಿಂದ ತಪ್ಪಿಸಿಕೊಳ್ಳಬಹುದಾಗಿದೆ.
WATCH VIDEO | ಇ-ಖಾತಾ ಪಡೆಯುವುದು ಹೇಗೆ? ಇಲ್ಲಿದೆ ನೋಡಿ ವಿಡಿಯೋ, ಕಂಪ್ಲೀಟ್ ಡೀಟೆಲ್ಸ್!
