Greater Bengaluru News9: ಎಷ್ಟೇ ಡಿಜಿಟಲ್, ಯುಪಿಐ ಅಂದರೂ ದಿನನಿತ್ಯದ ವ್ಯವಹಾರದಲ್ಲಿ ಚಿಲ್ಲರೆ ಸಮಸ್ಯೆ ಎಲ್ಲರಿಗೂ ಎದುರಾಗುತ್ತದೆ. ಅದರಲ್ಲೂ ಕೆಲವೊಮ್ಮೆ ಅಂಗಡಿಗಳಲ್ಲಿ ಅಥವಾ ಬಸ್ ಕಂಡಕ್ಟರ್ಗಳ ಬಳಿ 50 ಪೈಸೆ ಅಥವಾ ಹಳೆಯ 10 ರೂಪಾಯಿ ನಾಣ್ಯ ನೀಡಿದರೆ, “ಇದು ನಡೆಯಲ್ಲ, ಚಲಾವಣೆಯಲ್ಲಿ ಇಲ್ಲ” ಎಂದು ತಿರಸ್ಕರಿಸುವುದನ್ನು ನಾವು ನೋಡಿರುತ್ತೇವೆ. ಆದರೆ, ಈ ಗೊಂದಲಗಳಿಗೆ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಈಗ ಅಧಿಕೃತವಾಗಿ ತೆರೆ ಎಳೆದಿದೆ.
ನಮ್ಮ ಜೇಬಿನಲ್ಲಿರುವ ನಾಣ್ಯಗಳ ಮಾನ್ಯತೆಯ ಬಗ್ಗೆ ಆರ್ಬಿಐ ನೀಡಿರುವ ಸ್ಪಷ್ಟನೆಯ ಸಂಪೂರ್ಣ ವಿವರ ಇಲ್ಲಿದೆ.
ಸಾಮಾನ್ಯವಾಗಿ 50 ಪೈಸೆ ನಾಣ್ಯ ಈಗ ಮಾರುಕಟ್ಟೆಯಲ್ಲಿ ಕಾಣಸಿಗುವುದೇ ಅಪರೂಪ. ಹೀಗಾಗಿ ಇದು ಬ್ಯಾನ್ ಆಗಿದೆ ಅಥವಾ ಚಲಾವಣೆಯಲ್ಲಿ ಇಲ್ಲ ಎಂದು ಬಹುತೇಕರು ಭಾವಿಸಿದ್ದಾರೆ. ಆದರೆ, ಆರ್ಬಿಐ ಸ್ಪಷ್ಟಪಡಿಸಿರುವ ಪ್ರಕಾರ, 50 ಪೈಸೆ ನಾಣ್ಯವನ್ನು ಚಲಾವಣೆಯಿಂದ ಹಿಂತೆಗೆದುಕೊಳ್ಳಲಾಗಿಲ್ಲ. ಅಂದರೆ ಇನ್ನೂ ಚಲಾವಣೆಯಲ್ಲಿದೆ.
50 ಪೈಸೆ ಮಾತ್ರವಲ್ಲ, 1 ರೂಪಾಯಿ, 2, 5, 10 ಮತ್ತು 20 ರೂಪಾಯಿ ಮುಖಬೆಲೆಯ ಎಲ್ಲಾ ನಾಣ್ಯಗಳು ಸಂಪೂರ್ಣವಾಗಿ ಮಾನ್ಯವಾಗಿವೆ ಅಂತ ರಿಸರ್ವ್ ಬ್ಯಾಂಕ್ ಸ್ಪಷ್ಟಪಡಿಸಿದೆ.
ಯಾವುದೇ ವರ್ತಕರು ಅಥವಾ ವ್ಯಾಪಾರಿಗಳು ಈ ನಾಣ್ಯಗಳನ್ನು ಸ್ವೀಕರಿಸಲು ನಿರಾಕರಿಸುವಂತಿಲ್ಲ. ಇವು ಕಾನೂನುಬದ್ಧ ಮಾನ್ಯತೆಯನ್ನು ಹೊಂದಿದ್ದು, ಇದು ಮುಂದುವರೆಯಲಿದೆ ಎಂದು ಸ್ಪಷ್ಟವಾಗಿ ತಿಳಿಸಿದೆ.
ಜನರಲ್ಲಿರುವ ತಪ್ಪು ಕಲ್ಪನೆಗಳನ್ನು ಹೋಗಲಾಡಿಸಲು ರಿಸರ್ವ್ ಬ್ಯಾಂಕ್ ‘ಆರ್ಬಿಐ ಕೆಹತಾ ಹೈ’ (ಆರ್ಬಿಐ ಹೇಳುತ್ತಿದೆ) ಎಂಬ ಜಾಗೃತಿ ಅಭಿಯಾನವನ್ನು ನಡೆಸುತ್ತಿದೆ. ವಾಟ್ಸಾಪ್ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ಮೂಲಕ ಸಂದೇಶ ರವಾನಿಸಿರುವ ಕೇಂದ್ರೀಯ ಬ್ಯಾಂಕ್, ನಾಣ್ಯಗಳ ಬಗ್ಗೆ ಹಬ್ಬಿರುವ ಸುಳ್ಳು ಸುದ್ದಿಗಳನ್ನು ನಂಬಬಾರದು ಅಂತ ಜನರನ್ನು ಎಚ್ಚರಿಸಿದೆ.
ಹಲವು ಬಾರಿ ಅಂಗಡಿಗಳಲ್ಲಿ ಗ್ರಾಹಕರು ನಾಣ್ಯ ಕೊಟ್ಟಾಗ, ಅಂಗದಿಯವರು ‘ಇದು ಹಳೆಯದು, ಈಗಿನ ಹೊಸ ಡಿಸೈನ್ ಬೇರೆ ಇದೆ’ ಎಂದು ಹೇಳಿ ತಿರಸ್ಕರಿಸುತ್ತಾರೆ. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಆರ್ಬಿಐ, ‘ಒಂದೇ ಮೌಲ್ಯದ ನಾಣ್ಯಗಳು ಬೇರೆ ಬೇರೆ ವಿನ್ಯಾಸಗಳಲ್ಲಿ ಇರಬಹುದು. ಆರ್ಥಿಕ, ಸಾಮಾಜಿಕ ಮತ್ತು ಸಾಂಸ್ಕೃತಿಕ ವಿಷಯಗಳನ್ನು ಬಿಂಬಿಸಲು ಕಾಲಕಾಲಕ್ಕೆ ನಾಣ್ಯಗಳ ವಿನ್ಯಾಸ ಬದಲಾಗುತ್ತದೆ. ಹಾಗಂದ ಮಾತ್ರಕ್ಕೆ ಹಳೆಯ ವಿನ್ಯಾಸದ ನಾಣ್ಯ ಅಮಾನ್ಯವಾಗುವುದಿಲ್ಲ’ ಎಂದು ತಿಳಿಸಿದೆ.
ಗ್ರಾಹಕರು ಮತ್ತು ವ್ಯಾಪಾರಿಗಳಿಗೆ ಆರ್ಬಿಐ ಸಲಹೆ
ನಿರ್ಭಯವಾಗಿ ಬಳಸಿ: ಸಾರ್ವಜನಿಕರು ತಮ್ಮ ಬಳಿ ಇರುವ 50 ಪೈಸೆಯಿಂದ ಹಿಡಿದು 20 ರೂಪಾಯಿವರೆಗಿನ ಯಾವುದೇ ನಾಣ್ಯವನ್ನು ಹಿಂಜರಿಕೆಯಿಲ್ಲದೆ ವ್ಯವಹಾರಕ್ಕೆ ಬಳಸಬಹುದು.
ಸ್ವೀಕರಿಸಲೇಬೇಕು: ವ್ಯಾಪಾರಿಗಳು, ಬಸ್ ನಿರ್ವಾಹಕರು ಅಥವಾ ಇನ್ಯಾವುದೇ ಸೇವೆ ನೀಡುವವರು ಈ ನಾಣ್ಯಗಳನ್ನು ಪಡೆಯಲು ನಿರಾಕರಿಸಬಾರದು.
ದೀರ್ಘಕಾಲದ ಮಾನ್ಯತೆ: ಮಾರುಕಟ್ಟೆಯಲ್ಲಿ ಇರುವ ವಿಭಿನ್ನ ವಿನ್ಯಾಸದ ನಾಣ್ಯಗಳು ದೀರ್ಘಕಾಲದವರೆಗೆ ಚಲಾವಣೆಯಲ್ಲಿ ಇರುತ್ತವೆ. ಹೊಸ ನಾಣ್ಯ ಬಂದ ತಕ್ಷಣ ಹಳೆಯದು ರದ್ದಾಗುವುದಿಲ್ಲ.
ಆರ್ಬಿಐ ಸ್ಪಷ್ಟನೆಯ ಮುಖ್ಯ ಅಂಶಗಳು ಹೀಗಿವೆ,
50 ಪೈಸೆ, 1 ರೂ., 2 ರೂ., 5 ರೂ., 10 ರೂ., ಮತ್ತು 20 ರೂಪಾಯಿಯ ಎಲ್ಲಾ ನಾಣ್ಯಗಳು ಮಾನ್ಯತೆ ಹೊಂದಿವೆ.
ಯಾವುದೇ ನಾಣ್ಯವನ್ನು ಆರ್ಬಿಐ ಅಮಾನ್ಯಗಳಿಸಿ (ಡಿಮಾನಟೈಸ್) ಆದೇಶ ಹೊರಡಿಸಿಲ್ಲ.
ಹಳೆಯ ಮತ್ತು ಹೊಸ ವಿನ್ಯಾಸದ ಎಲ್ಲಾ ನಾಣ್ಯಗಳು ಕಾನೂನುಬದ್ಧವಾಗಿದ್ದು, ವದಂತಿಗಳ ನಂಬದಂತೆ ಸಲಹೆ
